Gleno, 29 Agostu 2025
Sekretáriu Estadu ba Ensinu Sekundáriu Jerál no Ensinu Sekundáriu Tékniku Vokasionál, Sua Excelénsia Sr. Domingos Lopes Lemos, akompaña husi Asesór Prinsipál Sr. Agusthino Lay, partisipa iha serimónia komemorativa Loron Konsulta Populár 30 de Agostu aumesmu tempu hodi halo abertura ba feira iha Gleno, Munisípiu Ermera.
Iha diskursu Sua Exelénsia, Sekretáriu Estadu Domingos Lopes Lemos hato’o agradecimento boot ba Komisaun Organizadora ba konvite hodi bele partisipa iha serimónia importante ne’e. Nia subliña tan katak ho orgullu boot hanesan Ermeraoan hodi reforsa importánsia momentu ida-ne’e ba povu Timor-Leste nian.
“Hanesan Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, ho fuan haraik-an no laran haksolok, ha’u hato’o agradesimentu boot ba Komisaun Organizadora ba konvite hodi mai hamutuk ho povu Ermera iha fatin istóriku ida-ne’e. Mai hau orgullu boot tebes hanesan Ermera nia oan,” nia hatete.
Governante ne’e mós enfatiza katak hosi parte Governu,liuhosi Ministériu Edukasaun, iha kompromisu atu kontinua valoriza no haforsa ensinu istória iha sistema edukativu, hodi nune’e bele kuda respeitu no konsiderasaun ba sakrifísiu povu timór-leste nian iha loron istóriku no sagradu 30 de Agostu 1999.
“Partisipasaun ita-boot sira nian iha komemorasaun ida-ne’e fó forsa no motivasaun boot, liuliu ba jerasaun foun sira,” nia akrexenta.
Iha mensajen ikus, Sua exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Sr. Domingos Lopes Lemos, konvida komunidade Ermera tomak atu partisipa ativamente iha programa komemorativu sira, hodi fó omenajen ba vítima, veteranus no eroi no eroina sira ne’ebé fó-an ba independénsia Timor-Leste.
Iha Serimónia ne’e mós, marka prezensa hosi Juís Konselleiru Tribunál Rekursu Dr. Duarte Tilman, Prezidente Autoridade Munisípiu Ermera Sr. José Martinho, Komandante PNTL Munisípiu Ermera Superintendente Ludgerio Picancio Madeira Lay, Prezidente CCITL Munisípiu Ermera Sr. Luís Alves Tilman no komunidade Ermera nian.
#jornalistamario
#MédiaME
