Díli, 01 Setembru 2025 - Ministériu Edukasaun, liuhusi Sua Exelénsia Ministra Edukasaun, Dra. Dulce de Jesus Soares, hamutuk ho dirijente no funsionáriu tomak ministériu nian, realiza serimónia isár Bandeira RDTL ba inísiu fulan fulan Setembru tinan 2025, iha resintu Ministériu Edukasaun, Vila-Verde.
Iha Diskursu, Sua Exelénsia Ministra Edukasaun, Dra. Dulce de Jesus Soares, agradese ba dirijente sira ne'ebé organiza estudante no manorin sira hodi partisipa iha loron imiportante sira hanesan, 20 agostu loron FALINTIL ba Dala-50 no 30 agostu loron konsulta populár ne'ebé partisipante barak mak mai husi estudante no manorin sira ho objetivu mak estudante sira bele buka hatene kona-ba situasaun sira ne'ebé mak akontese iha rai-laran.
"Eventu importante sira ne'e importante ba estudante sira hodi partisipa, tanba husi eventu sira ne'e estudante sira bele buka hatene kona-ba istória pasadu nian hodi bele reforsa liután sira nia aprendizajen iha aula durante ne'e no husi istória hirak ne'e bele fanu sira nia vontade aprende atu bele sai joven ne'ebé mak di'ak ba nia família, sosiedade no nasaun doben Timor-Leste", dehan S. E. Ministra Edukasaun.
Governante ne'e mós husu ba dirijente eskola sira hodi tau atensaun máximu ba manorin sira, tanba dalabarak manorin sira mós abandona eskola barak, tanba ne'e ba dirijente sira tenki foti auto-keixa hasoru sira, nune'e ema hotu bele hola responsabilidade ne'e ho sériu.
#jornalistaluisalmeida
#MédiaME
