Díli, 01 Setembru 2025 – Sua Exelénsia Ministra Edukasaun, Dra. Dulce de Jesus Soares, hamutuk ho Reitór Institute Of Buseness (IOB), Sr. Pedro Ximenes, despede estudante hamutuk na’in 52, ne’ebé sei ba kontinua eskola iha Nasaun Portugal iha nivel Ensinu Superiór, Ensinu Sekundáriu Jerál no Ensinu Sekundáriu Tékniku Vokasionál, iha loron 04 fulan setembru tinan 2025. Serimónia despedida ne’e realiza iha Sala Konferénsia Ministériu Edukasaun, Vila-Verde.
Iha entrevista, Sua Exelénsia Exelénsia Ministra Edukasaun, Dra. Dulce de Jesus Soares, hateten, ohin dader simu estudante sira husi Centro Linguística, Culturál e Treinamento Vocacionál (CLCTV-IOB), ne’ebé mak sira tuir ona programa Lian Portugeza hodi prepara ba kontinua estudu iha nasaun Portugal.
“Ministériu Edukasaun fó apoiu tomak hodi kontinua motiva estudante sira no agradese ba IOB no inan-aman sira ne’ebé mak tau ona esforsu boot tebes hodi haruka oan sira ba eskola iha Portugal, ne’ebé hahú husi tinan 2017 to’o agora no fiar katak ema barak mak hetan ona oportunidade hodi asesu ba Eskola Sekundáriu Jerál no Tékniku Vokasionál iha Portugal”, dehan S. E. Ministra Edukasaun.
Governante ne’e husu ba estudante sira atu estuda maka’as hodi atinji mehi ne’ebé mak eroi no eroiña sira husik hela. Nafatin koopera ho situasaun sira, liuliu kultura sira ne’ebé diferente, atu bele hetan susesu iha futuru.
Iha fatin hanesan, Reitór Institute Of Buseness (IOB), Sr. Pedro Ximenes, hateten, ohin mai halo despedida ho estudante sira hamutuk na’in 52, ne’ebé mak sei aranka ba Portugal iha loron 04 fulan setembru tinan 2025 ho totál estudante hamutuk na’in 35 no fulan oin sei tuir tan, husi estudante hirak ne’e, na’in 25 sei kontinua estudu iha ensinu superiór no restu ba kontinua estudu iha ensinu sekundáriu jerál no tékniku vokasionál.
“Sira liu ona prosesu formasaun durante fulan 6-8 iha IOB no sira matrikuladu tiha ona iha eskola sira iha Portugal no sira to’o iha ne’ebá sei hahú kedas sira-nia prosesu aprendizajen. Durante hahú to’o agora, ita haruka ona estudante hamutuk 320 no tinan ne’e haruka tan 52, tanba ne’e totál husi estudante ne’ebé haruka ba hamutuk na’in 372”, dehan Reitór IOB.
#jornalistaluisalmeida
#MédiaME
