Ermera, 20 Setembru 2025
Sekretáriu Estadu Ensinu Sekundáriu Jerál no Tékniku Vokasionál, Sr. Domingos Lopes Lemos, hato'o ninia apresiasaun bo'ot ba jestaun di'ak iha Eskola Ensinu Báziku Filiál (EBF) Nº 208 Biassú, Hatulia Vila, Munisípiu Ermera. Apresiasaun ne'e mosu hafoin vizita surpreza ida, ne'ebé Sekretáriu Estadu haree rasik kondisaun no progresu edukasionál iha eskola ne'e.
Iha ninia vizita, Sekretáriu Estadu nota katak Koordenadór Eskola, Júlio Ximenes Madeira, ne'e hala'o jestaun efisiente, hahú husi administrasaun to'o kualidade aprendizajen. Nia observa katak Koordenadór servisu maka'as atu garante profesór sira hanorin ho kualidade no estudante sira hetan edukasaun ne'ebé di'ak. Nia mós gaba ambiente eskola ne'ebé moos, organizada, no Konstrutivu, ne'ebé kontribui ba prosesu aprendizajen ne'ebé di'ak.
"Ha'u sente orgullu no apresia tebes ba Koordenadór Eskola EBF Nº 208 Biassú nia jestaun di'ak, ne'e sai ezemplu ida ba eskola sira seluk iha Timor-Leste. Ne'e hatudu mai ita katak ho kompromisu, dedikasaun, no kolaborasaun, ita bele hadi'a kualidade edukasaun iha ita-nia nasaun." dehan Sekretáriu Estadu ESJ-ESTV.
Sekretáriu Estadu mós hateten katak jestaun ne'e la'ós de'it hadi'a kualidade edukasaun, maibé mós kria relasaun forte ho inan-aman sira no komunidade lokál. Kolaborasaun ida-ne'e bele lori progresu no dezenvolvimentu ba eskola.
Daudaun ne'e eskola atende estudante na'in 285 (mane 149 no feto 136) no iha profesór na'in 12. Fasilidade edukativu hanesan: Sala Aula aprendizajen 8, Sala Biblioteka 1, Eskritóriu 1, Armazén: 1, Dapur merenda eskolár :1, To’os eskolár: 1 no sanitaria 2.
#JornalistaEmiliodaCruzLopes
#MédiaME
