Ermera, 20 Setembru 2025
Estudante sira husi Eskola Ensinu Báziku Sentrál (EBC) 20 de Novembro Hatolia, Munisípiu Ermera, espresa sira-nia konfiansa bo’ot atu hasoru ezame nasionál ne'ebé sei akontese iha Fulan Outubru. Ho preparasaun ne'ebé hala'o husi eskola no apoiu ne'ebé forte husi profesór sira no inan-aman, estudante sira prontu ona atu manan dezafiu importante ne'e.
Iha intervista, Diretór Eskola EBC 20 Novembro Hatolia, Mestre Alvaro dos Santos dehan katak konfiansa ne'e mai husi programa preparasaun ne'ebé maka'as ne'ebé eskola hala'o ona. Programa ne'e inklui aula adisionál ne'ebé foka liu ba matéria prinsipal, no mós simulasaun ezame hodi ajuda estudante sira atu familiariza ho formatu no tempu ezame nasionál nian.
"Ami fiar katak ami-nia estudante sira iha abilidade atu hetan rezultadu ne'ebé di'ak. Sira servisu maka'as tebes no dedika aan ba sira-nia estudu," dehan Diretór Eskola.
Alda Gomes, estudante finalista ida, espresa ninia konfiansa ba Jornalista sira katak: "Ha'u agora prontu ona. Ha'u la sente estrese no difikuldade bo’ot tanba ami-nia profesór sira hanorin ami ho di'ak, no sira fó konsellu mai ami ne'ebé útlil tebes."
Edarita Fátima Castro Exposto, mós hatutan tan katak: "Ami sempre estuda hamutuk ho grupu no fahe informasaun ba malu. Ne'e ajuda ami atu komprende didi'ak matéria hotu-hotu."
Apoiu ne'ebé estudante sira hetan la'ós de'it husi eskola, maibé mós husi sira-nia inan-aman no komunidade. Komunidade Hatolia nian rekoñese katak edukasaun mak xave ba futuru, no sira hotu-hotu fó apoiu moral ne'ebé makas ba estudante sira.
Eskola EBC 20 de Novembro daudaun ne'e atende estudante na'in 335 (mane 163 no feto 172) no iha profesór na'in 23 (mane 21 no feto 2). Fasilidade edukativu hanesan: Sala Aula aprendizajen 9, Sala Bibliotéka 1, Eskritóriu 1, no sanitáriu 9.
#JornalistaEmiliodaCruzLopes
#MédiaME
