Dili, 27 Novembru 2025
Sua Exelénsia Ministra Edukasaun, Dra. Dulce de Jesus Soares, hamutuk ho Embaixadór iha Timor-Leste, Sr. Kimura TETSUYA, Prezidente Autoridade Munisípiu Manatutu, Sr. Luis Inacio Henrique Fernandes, Reprezentante UNDP Katyna Argueta, hodi inaugura Laboratóriu TIK ne’ebé uza enerjia solár iha eskola sekundáriu hamutuk 15, iha munisípiu 3 mak, Manatutu, Manufahi no Ainaru. Lansamentu simbólika ne’e realiza iha ESG Kay-Rala Manatutu.
Iha diskursu, Sua Exelénsia Ministra Edukasaun, Dra. Dulce de Jesus Soares, hateten, Ministériu Edukasaun iha komitmentu boot atu dezenvolve estudante sira-nia abilidade sékulu 21. Kompeténsia sira ne’e sei tulun sira atu hetan susesu ekonómiku no pesoál iha mundu ne’ebé evolui ba beibeik, atu bele hetan abilidade sira hanesan kriatividade, hanoin krítiku, rezolusaun ba problema ho analítiku, kooperasaun no komunikasaun, fleksibilidade, responsabilidade, toleránsia no respeitu.
“Ha’u sente haksolok tebes, tanba bele hamutuk ho Ita-Boot sira ohin hodi bele inaugura laboratóriu TIK sira-ne’ebé uza enerjia solár iha eskola ensinu sekundáriu hamutuk 15 iha munisípiu Manatuto, Ainaro, no Manufahi. Eventu simbóliku ohin reprezenta la’ós de’it lansamentu ba infrastrutura foun, maibé ida-ne’e reprezenta ita-nia kompromisu koletivu atu harii sistema edukaaun ida-ne’ebé reziliente, inkluzivu no preparadu ba futuru”, dehan S. E. Ministra Edukasaun.
Governante ne’e hatutan, Ministériu Edukasaun iha kompromisu atu espande sistema TIK sira iha eskola sira hotu, no mós atu asegura sistema sira-nia sustentabilidade. Sei kontinua serbisu hamutuk ho munisípiu, eskola no parseiru sira atu haluan oportunidade ba aprendizajen dijitál no asegura katak la iha estudante ida ne’ebé hela iha kotuk.
“Ami sente gratidaun profundu ba Governu Japaun ba sira-nia apoiu laran-luak, ba projetu ida-ne’e, maibé mós ba sira-nia apoiu oioin. Ha’u sente, ha’u ba eventu barak durante fulan hirak nia laran iha-ne’ebé ha’u agradese Sua Exelénsia Embaixadór Tetsuya, tanba Governu Japaun apoia Ministériu Edukasaun iha área oioin, inklui infrastrutura eskolár, bee, no ensinu ba matemátika. Ami mós agradese ba UNDP, tanba sira-nia lideransa, perisia tékniku, no parseria metin ho Ministériu Edukasaun no Ministériu Obras Públikas”, dehan S. E. Ministra Edukasaun.
Iha fatin hanesan, Sua Exelénsia Embaixadór Japaun iha Timor-Leste, Sr. Kimura TETSUYA, hateten, haksolok tebes partisipa iha serimónia entrega painel solár ba eskola Sekundária Jerál Kay-Rala Manatutu no agradese ba ema hotu ne’ebé mak servisu maka’as ba interasaun susesu ida ne’ehodi kontribui signifikativamente ba edukasaun ho kualidade no sustentabilidade iha Timor-Leste.
“Ha’u nia agradesimentu siseru espesiálmente ba Ministra Edukasaun, tanba ho nia lideransa no apoiu hodi lori ami –nia projetu sira ba susesu. Ho kontribuisaun finanseiru USD 5. 078 dolár amerikanu husi povu Japaun”, dehan S. E. Embaixadór Japaun.
Setór edukasaun mak pilár fundamentál ba projetu prioridade Japaun nian, tanba ne’e ohin entrega painel solár sira iha laboratóriu eskola sira hamutuk 15 ho asesu internét ne’ebé viavél liuhusi aativa iha painel solár sira ne’e atu estudante sira iha kbiit hodi aprende kle’an no efisiénte liután hodi bele hetan koñesimentu no abilidade esensiál sira atu buras iha dékada sira tuir mai.
#jornalistaluisalmeida
#MédiaME
