Likisá, quarta-feira, 26 Novembru 2025
Ministériu Edukasaun, liuhusi Diretór Nasionál Gabinete Avaliasaun, Dezenvolvimentu Kurríkular no Rekursus Pedagógiku (DGADCRP), Sr. João Mau Pelo, hamutuk ho Reprezentante PAM Likisá, Sr. Zito António de Oliveira da Costa, Diretór Munisípiu Likisá, Sr. Domingus Ramos, no Sekretáriu Ezekutivu Asuntu UNESCO Timor-Leste, Sr. Luís Nívio da Fátima Soares, halo abertura ofisiál ba Komemorasaun Loron Mundial Siênsia no Matemátika iha ESGP Núm.1 Likisá.
Iha diskursu nia, Diretór DGADCRP Sr. João Mau Pelo hateten katak komemorasaun ida-ne’e importante tamba siénsia no matemátika mak área fundamental ne’ebé ajuda komunidade eskola kompriende mundu, hanorin hanoin lojiku, rigor no prezisaun. Nia dehan mos katak liu husi atividadi hanesan palestra, demostrazsaun pratika, apreséntasaun projetu, kompetisaun, esperiénsia laboratóriu no dezafiu matemátika, estudante sira bele hatudu kreatividade no abilidade sira nian.
“Eventu ida ohin hatudu klaru katak bainhira ita fó espasu no oportunidade ba aprendizajen, investigasaun no apreséntasaun, ita nia foin-sa’e sira mosu talentu, responsabilidade no espirítu inovatívu. Loron Mundial Siénsia no Matemátika la’ós de’it serimónia, maibé oportunidade ida ne’ebé fó enfázi ba importánsia edukasaun sira-ne’e ba jerasaun foun," dehan Diretór João Mau Pelo.
Reprezentante PAM Likisá, Sr. Zito António de Oliveira da Costa, mos hateten katak siénsia mak matadalan ba dezenvolvimentu no transformasaun sosiál iha mundu modernu. "Siénsia mak hudi ba futuru husi individu to’o ba moris família iha tempu oin, nia akresenta.
Iha parte seluk, Sekretáriu Ezekutivu Asuntu UNESCO iha Timor-Leste, Sr. Luís Nívio da Fátima Soares, fó benefísiu ba atividadi ida-ne’e, tanba fó oportunidade ba estudante sira atu aprende husi pratika no aumenta sira nia kapasidade iha área siénsia no matemátika.
“Mestri sira tenke kontinua uza rekursus didátiku ne’ebé iha, hodi fó estudante sira aprende liu husi pratika. Liuhusi esperiénsia pratika, koñesimentu estudante sira kona-ba siénsia no matemátika sei sai metin liu, nia remata.
#MédiaME
#JornalistaJustinonenoQuefi
