Baucau, 28 Novembru 2025
Sua Exelénsia Ministra Edukasaun, Dra. Dulce de Jesus Soares, prezidi serimónia isár bandeira iha ámbitu komemorasaun tinan-50 Proklamasaun Unilaterál ba Independénsia Timor-Leste nian hamutuk ho Prezidente Autoridade Munisípiu Baucau, Veteranu, Veterana, Profesór sira, Estudante, Komunidade sira no Kamada sosiál sira hotu Munisípiu Baucau nian, iha resintu Administrasaun Munisípiu Baucau.
Iha entrevista, Sua Exelénsia Ministra Edukasaun, Dra. Dulce de Jesus Soares, hateten, liuhusi desizaun Konsellu Ministru, destaka mai iha iha Munisípiu Baucau, atu prezidi serimónia isár Bandeira iha ámbitu komemorasaun tinan 50 Proklamasaun Unilaterál ba Independénsia Timor-Leste nian, tanba ne’e, mai iha ne’e hodi akompaña Prezidente Autoridade Munisípiu. Ohin programa ne’e la’o di’ak tebes, tanba hetan partisipasaun husi parte hotu.
“Durante ita-nia idependénsia, ita iha avansu boot ida liuliu iha Ministériu Edukasaun, mak ita iha estudante ne’ebé mak durante ne’e iha ha’u-nia portofóliu iha iha estudante hamutuk 300.000 mil resin, profesór hamutuk 16 mil no mós iha funsionáriu rejime jerál Ministériu Edukasaun nian, ida ne’e mak avansu boot ida iha ita-nia ukun rasik-an, maske neineik, maibé Ministériu Edukasaun asume responsabilidade boot ida hodi hasa’e kualidade edukasaun, liuhusi infrestrutura, formasaun ba profesór sira, rekrutamentu ba profesór sira, revizaun kurríkulu hodi prepara estudante sira hodi infrenta sira-nia futuru hodi bele involve iha preosesu dezenvolvimentu”, dehan S. E. Ministra Edukasaun.
Governante ne’e hatutan, iha ámbitu komemrasaun ne’e, Ministériu Edukasaun mós halo distribui simbólika kadeira no meza ba diretór eskola sira ho nia estrutura ba eskola hamutuk 9, husi ensinu báziku no ensinu sekundáriu jerál no TEKVOK. distribuisaun sei halo mós iha munisípiu sira seluk, nune’e dirijente eskola sira bele utiliza ba halo servisu loronloron nian ho di’ak.
Iha fatin hanesan, Prezidente Autoridade Munisípiu Baucau, Sra. Veneranda Lemos, hateten, atividade iha Baucau mak, iha feira ba produtu lokál, parte lokraik nian sei iha mós atividade konvivu ho komunidade sira no atividade sira seluk hodi bele anima liután komunidade sira hotu Munisípiu Baucau nian iha ámbitu Komemorasaun Loron tinan 50 Proklamasaun Unilaterál ba Independénsia Timor-Leste nian.
“Ita mós agradese ba governu sentrál ne’ebé indika ona membru governu, tanba ne’e iha Baucau ita simu Sua Exelénsia Ministra Edukasaun, Dra. Dulce de Jesus Soares, ne’ebé mai ho ekipa husi Ministériu Edukasaun hodi ajuda tebes ita iha Baucau, hahú iha loron 27, iha de’it kampu laran to’o kalan hodi halo preparasaun ba loron espesiál ida ne’e”, dehan PAM Baucau.
Prezidente Autoridade ne’e hatutan, serimónia ohin, hetan partisipasaun husi Prezidente Konsellu Veteranu inklui veteranu no veterana sira seluk no kamada sosiál sira seluk hodi bele festeza loron nasionál ne’e hamutuk ho komunidade sira iha Munisípiu Baucau.
#jornalistaluisalmeida
#MédiaME
