Díli, 28 Agostu 2025 - Governu KONSTITUSIONÁL Da-9, liuhusi Ministériu Edukasaun, introduz kurríkulu nasionál baze siklu datoluk foun ho objetivu, atu hasa’e liután estudante sira-nia hanoin krítiku, analítiku, komunikasaun no kooperasaun bazeia ba edukasaun globál iha sékulu 21 ne’e. atividade ne’e, realiza iha Salaun Ian Martin INFORDEPE Matadoru, Díli.
Ohin loron marka tan istória importante ba dezenvolvimentu edukasaun iha Timor-Leste, tanba iha Governu Konstitusionál da-9, Ministériu Edukasaun liuhusi unidade kurríkulu halo revizaun ba kurríkulu siklu datoluk, ne’ebé mak la’o ona durante tinan 10, no tinan ne’e halo revizaun hodi kompleta.
“Ita iha ona livru no gia ba profesór sira mós iha hotu ona, no ita tama ona ba faze formasaun, nune’e iha tinan letivu foun ba siklu datoluk 70 anu, ita uza ona kurríkulu foun no mós ba iha tinan 2026 ita halo revizaun ba 80 anu, nune’e kurríkulu ne’e bele iha aliñamentu husi 70 anu to’o 120 anu”, dehan S.E. Ministra Edukasaun.
Governante ne’e hatutan, iha kurríkulu ida ne’e, koko eleva ita-nia an ba edukasaun globál hodi hatama mós matéria mudansa klimátika no introdus mós abilidade estudante sira-nian, tanba kurríkulu ne’e la’os konteudu, maibé bazeia ba kompeténsia no barak liu sei dezenvolve estudante sira-nia hanoin krítiku, analítiku, komunikasaun no mós kooperasaun.
Serimónia ne’e, hetan partisipasaun husi, Sua Exelénsia Sekretráriu Estadu Ensinu Sekundáriu Jerál no Ensinu Sekundáriu Tékniku Vokasionál, Sr. Domingos Lopes Lemos, Country Representative of UNICEF, Sra. Patrizia de Giovanni, Country Director WHO, Dr. Arvind Mathur, Country Director KOICA, Sra. Youn Hwa Kang, Prezidente INFORDEPE, Sr. Domingos Martins no dirijente sira husi Ministériu Edukasuan.
#jornalistaluisalmeida
#MédiaME
