Lautem, 29 Agostu – Sua Exelénsia Ministra Edukasaun, Dra. Dulce de Jesus Soares, hamutuk ho Embaixadora Boa Vontade ba Edukasaun, Dra. Kirsty Sword-Gusmão, Prezidente Autoridade Munisipál Lautem, Sr. Mélio de Jesus, Diretora Nasionál Saúde Maternu Infantil Ministériu Saúde , Sra. Madalena Fátima Gomes, Reprezentante hosi Embaixada Austrália, Reprezentante hosi OMS, Reprezentante hosi UNICEF, halo Lansamentu Distribuisaun Ókulu, ba estudante sira ne’ebé mak ho problema vizuál, iha Munisípiu Lautem.
Iha atividade ne’e Sua Exelénsia Ministra Edukasaun, Dra. Dulce de Jesus Soares, hateten, ohin mai fahe óklu ba estudante sira ne’ebé mak liuhusi rastreiu ida husi Ministériu Edukasaun, Ministériu Saúde no mós parseiru sira halo hodi deskobre katak iha labarik barak mak iha problema matan hodi lakonsege haree hetan letra sira ne’ebé mak iha livru laran.
“Ministériu Edukasaun hamutuk ho eskola fó lista estudante ba doutór Gil hodi halo diagnosa, no dadaun ne’e liuhusi Embaixadora Boavontade Edukasaun, Mana. Kirsty Sword Gusmão, servisu hamutuk ho Fundasaun NAROMAN hodi oferese óklu mai estudante sira hamutuk 30 resin ne’ebé mai mós husi eskola hamutuk 30”, dehan S. E. Ministra Edukasaun.
Governante ne’e hatutan, ba futuru Ministériu Edukasaun sei tau orsamentu, nune’e ba estudante sira ne’ebé deskobre katak presiza apoiu ba sira-nia matan no tilun, atu bele responde sira-nia nesesidade iha prosesu aprendizajen nian.
Iha fatin hanesan, Embaixadora Boavontade ba Edukasaun, Dra. Kirsty Sword Gusmão, hateten, fahe óklu ohin loron konsidera hanesan hakaat dahuluk iha Ministériu Edukasaun nia esforsu atu garante edukasaun ba ema hotuhotu, tanba estudante sira ne’ebé simu óklu ohin, reprezenta númeru kiik husi labarik hotuhotu iha nasaun tomak, ne’ebé presiza asisténsia.
“Kolaborasaun di’ak entre Ministériu Edukasaun no Ministériu Saúde ba oin, importante tebetebes hodi bele halo servisu ida ne’e no bele iha kontinuasaun ba futuru, tanba labarik sira mak futuru nasaun ne’e nian”, dehan S. E. Embaixadora Boavontade Edukasaun.
Aleinde ne’e, Prezidente Autoridade Munisípiu Lautem, Sr. Mélio de Jesus, hateten, apresia no agradese tebes ba inisiativa ida ne’e hodi tau atensaun máximu ba estudante sira ne’ebé mak infrenta difikuldade iha prosesu aprendizajen, ne’ebé konsidera hanesan bareira ida ne’ebé presiza ema hotu nia atensaun hodi fó solusaun, atu garante katak sistema edukasun iha Timor-Leste ne’e sei la husik ema ida iha kotuk.
“Edukasaun nu’udar pilár ida ne’ebé importante no determinante tebes atu bele sustenta no promove konstrusaun estadu ida ne’ebé forte no sustentavel, tanba ne’e mak aspetu ida ne’e tenki konsidera hanesan prioridade ida iha aliñamentu estratejia nasionál hodi bele hasai nasaun iha frazilidade”, dehan S. E. PAM Lautem.
Iha fatin hanesan, Diretora Nasionál Saúde Maternu Infantil Ministériu Saúde , Sra. Madalena Fátima Gomes, hateten, saúde matan mak odamatan ba labarik sira atu aprende hodi atinji sira-nia mehi, tanba ne’e programa ida ne’e importante, atu garante no asegura katak la iha labarik timoroan ida mak husik hela iha kotuk, tanba de’it problema vizaun.
“Iha Timor-Leste, iha kalkulasaun katak, ema ho difisiénsia vizuál hamutuk 170 mil, inklui labarik sira, tanba ne’e Ministériu Saúde no Ministériu Edukasaun komprometidu atu kolabora, tanba eskola mak fatin ida ne’ebé di’ak liu ba deteksaun sedu no fornesimentu óklu”, dehan Diretora Nasionál Saúde Maternu Infantil Ministériu Saúde.
Resultadu rastreiu husi ekipa Saúde no mós Saúde Eskolár Ministériu Edukasaun, totál estudante 12,141, difikuldade matan 73 ,na'in 28 simu óklu, na'in 6 matan di'ak, na'in 2 labele uza óklu, na'in 2 seluk referral ba hospitál, na'in 1 uza matan falsu, no na'in 2 moras la partisipa rastreiu no falta na'in 30 mak seidauk partisipa iha rastreiu finál hodi simu óklu.
Estudante sira ne'e mai husi EBF 30 de agosto, EBC Raça ,EBF tasi ibun ,EBF Leuro ,EBC Kapuali Souro ,EBF Forma, EBF TChay, EBF muapitine, EBC Home, EBC Coro Asu, EBF Ramxabean , EBC Herois Lere Loho, EBF Pairara no EBC Com.
#jornalistaluisalmeida
#MédiaME
