Sesta, 29 agustu 2025
Ministériu Edukasaun Liuhusi Diretór Jerál Ensinu Sekundariu Sr. Deolindo Da Cruz Akompana Vise-Primeiru Ministru No Ministru Koordenadór Asuntu Sosiais, No Ministru Dezenvolvimentu Habitasaun Rural, Eng. Mariano Assanami Sabino no Polísia Nasionál Timor-Leste (PNTL) Halao Dialogu Ba Paz Liuhusi Formasaun Karater Iha Konstrusaun Paz, Estadu, Nasaun No Karater Iha Eskola Sekundária Teknika Vokasionál Grupu Teknolojia Industria (GTI) Becora.
Iha diskursu, Vise-Primeiru Ministru No Ministru Koordenadór Asuntu Sosiais, No Ministru Dezenvolvimentu Habitasaun Rural, Eng. Mariano Asanami Sabino hatete, ministériu edukasaun hakarak hili duni eskola Ensinu Sekundária Teknika Vokasionál, Grupu Teknolójia Industria (GTI) Becora sai nu’udar alvu ba dialogu ida ne’e tanba eskola tekniku nu’udar eskola ida ne’ebé maka úniku ba teknolojia, industria no inovasaun dezde okupasaun Indonesia nian.
“Ohin ita hakarak dialogu iha eskola tekniku vokasionál sira tanba Eskola Sekundária Teknika Vokasionál importante tebes ba estadu no ita-nia nasaun hodi operasionaliza vizaun estadu no operasionaliza planu estratéjiku dezenvolvimentu nasionál tanba ita bele iha vizaun no hanoin ne’ebé furak maibe atu operasionaliza vizaun sai realidade no prátika presiza tekniku sira,” Dehan V-PM Assanami.
Enkuantu reprezentante Ministériu Edukasaun, Diretór Jerál Ensinu Sekundariu Sr. Deolindo Da Cruz argumenta, dialogu ida ohin, importante tebes ba profesór no estudante sira tanba iha dialogu ida ne’e sei koalia liu formasaun karater hodi kontribui ba dezenvolvimentu nasaun liuhusi paz no dame.
“Estudante sira nu’udar jerasaun kontinuadór ba nasaun ida ne’ebé ita-nia heroi sira luta liuhusi sakrifisiu, terus no torturasaun oin-oin tanba ne’e ita-boot sira iha papél importante atu kontribui no hatutan heroi sira-nia mehi ba Timor-Leste liuhusi karater paz no establidade,” Tenik DJESG.
Entretantu iha atividade dialogu ne’e hetan partisipasaun maksimu husi Vise-Primeiru Ministru No Ministru Koordenadór Asuntu Sosiais, No Ministru Dezenvolvimentu Habitasaun Rural, Eng. Mariano Asanami Sabino, Diretór Jerál Ensinu Sekundariu Sr. Deolindo Da Cruz, Polísia Nasionál Timor-Leste (PNTL), Profesór no Estudante sira.
#JornalistaJumat&Elias
#MédiaME
