Díli, 30 Agostu 2025
Hodi selebra loron Konsulta Populár ba dala-26, Ministériu Edukasaun aprezenta drama ida iha Largo Lecidere, ne'ebé atrai partisipasaun bo'ot husi ema hotu. Atividade ne'e akontese hafoin estudante no profesór sira halo marxa husi Jardim Motael mai Jardim Largo Lecidere.
Funsionáriu sira Ministériu Edukasaun nian husi Diresaun Nasionál Sistema Informátika no Teknolojia (DNSIT) no Institutu Nasionál ba Formasaun Dosente no Profisionál Edukasaun (INFORDEPE) mak sai atór, ne'ebé treinu durante loron rua nia laran hodi prepara drama ho di'ak tebes.
Drama ne'e hatudu ho emosaun ne'ebé maka'as kona-ba luta povu Timor-Leste nian iha tinan 1999, hodi hatudu valór no korajen ne'ebé povu iha hodi la ta'uk ba ameasa sira atu defende sira-nia direitu ba ukun rasik-an. Espetadór barak, inklui jerasaun uluk, tanis no sente kona-ba sakrifísiu ne'ebé uluk sira-nia avó sira halo ona.
Atividade ne'e mós atrai partisipasaun husi líder nasionál sira, hanesan Sua Exelénsia Prezidente Repúblika, Vise Primeiru Ministru, Ministra Edukasaun, no mós membru governu sira.
Reasaun emosionál husi partisipante sira hatudu katak uza drama sai dalan ne'ebé efetivu atu hanorin no hatene kona-ba istória importante ba nasaun.
#FotoMAE
#JornalistaEmiliodaCruzLopes
#Média-ME
