Díli, 28 Agostu 2025 – Ministériu Edukasaun, reprezenta husi Xefe Departamentu Kurríkulu Edukasaun Pré-Eskolár, Ensinu Báziku no Rekorrente Sra. Edia Cecilia Elizita Monteiro fó sai progresu revizaun Kurríkulu Nasionál Foun ba Ensinu Báziku Siklu Datoluk, liu-liu ba klase 7⁰ Anu nian ba programa Grande entrevista iha estúdiu GMNTV, Bebora, Díli.
Reprezentante Ministériu Edukasaun Sra. Edia esplika, razaun ba revizaun kurrikulu ne'e tanba kurríkulu ne'ebé implementa ona hahú husi tinan 2010 to'o agora, kuaze tinan 15 ona. Iha tempu ne'e, mudansa barak mak akontese ona iha kontestu nasionál no internasionál, tanba ne'e presiza tebes atu halo mudansa ba kurríkulu atu bele hatán ba estudante sira-nia nesesidade iha tempu ohin loron.
“Kurríkulu foun ne'e iha materia hamutuk sanulu (10) ne'ebé Ministériu Edukasaun mak responsabiliza inkuli materia relijiaun mós iha, maibé ne'e responsabilidade hosi Comissão Nacional da Educação Católica Timor-Leste (CONECTIL).* no materia sira ne'e fahe ba kategoria tolu hanesan dezenvolvimentu Linguístika kompostu husi materia Tetun no Portugés; dezenvolvimentu Sientífiku maka Matemátika, Siénsia Naturais, no Siénsia Sosiál, nomós dezenvolvimentu Sosiál no Pesoál mak Arte no Kultura,” Dehan Sra. Edia.
Reprezentante ne’e mós promete, Revizaun kurríkulu foun ba Ensinu Báziku Siklu Datoluk nian, tinan 2026 sei implementa ba klase 7⁰ anu no tinan 2027 sei implementa ba klase 8⁰ anu nomós tinan 2028 sei implementa ba klase 9⁰ anu.
Ministériu Edukasaun espera katak kurríkulu foun ne'e bele hasa’e kualidade edukasaun no prepara estudante sira atu hatán ba dezafiu iha futuru, hodi kontribui ba dezenvolvimentu nasaun. Nune'e revizaun ne'e pasu importante ida atu asegura katak edukasaun Timor-Leste nian evolui no la'o tuir progresu mundiál.
#jornalistaemilio
#jornalistaelias
#MédiaME
