Natarbora 10-04-2025, Sua Exelénsia Sekretáriu Estadu ESJ-ESTV Sr. Domingos Lopes Lemos, hamutuk ho Diretór Nasionál ESTV Sr. Fernando M. Gama, hala'o vizita kortezia ba iha eskola ESTVP Agríkola Natarbora hodi observa direta kondisaun eskola refere aumesmu tempu hodi enkontru ho Manorin-nain, estudante no autoridade lokal iha salaun enkontru eskola estvp Natarbora kinta-feira ne’e.
Iha intervensaun sua exelénsia sekretáriu estadu ESG-ESTV hateten, ohin ami mai vizita iha eskola téknika vokasionál agrikola Natarbora, hetan prezensa hosi autoridade lokál postu, no eskola ne’ebé mak entuziasmo tebes iha sira nia partisipasaun ne’e, hodi fó koragen di’ak ba Manorin-nain sira, hodi hala’o kna'ar ho di’ak.
“Obrjetivu hosi vizita ne’e hodi hare direta estudante sira nia toba fatin, liu hosi biban ne’e Sua Exelénsia hateten liu hosi Ministeriu Edukasaun sei tau atensaun masimu liu-liu ba fatin toba mane sira nian, ne’ebé kondisaun ladun di’ak, ho sala aula ne'ebé, presiza Ministériu tenki tau matan.
Governante ne’e mos reafirma-tan katak, iha tinan ida ne’e liu hosi Ministériu Edukasaun fornese kareta picup gran max rua ne’ebé fornese ba eskola rua mak hanesan, eskola agríkola Moleana Bobonaro no eskola téknika vokasionál agríkola Natarbora. Liu hosi meius ida ne’e iha tempu badak eskola sira sei prodúz aifuan modo sira hodi nune’e sira fornese merenda ba eskolar sira.
Iha fatin hanesan diretór eskola téknika vokasionál agríkola Natarbora Sr. Agustinho dos santos agradese ba Governu liu hosi Ministériu Edukasaun bele ajuda ona ami nia eskola, bele iha mundansa buat barak iha eskola ne’e, preokupasaun sira ne’ebé mak eskola infrenta mak toba fatin ba mane no feto sira la merese atu uza, iha fatin toba sia (9) maibé, iha deit tolu mak estudnate sira uza. Preokupasaun seluk mak rezidénsia profesór sira nian mak la dun di'ak ona presiza nafatin Ministeriu Edukasaun ninia tulun no tau matan nafatin mai ami" dehan diretór.
Eskola téknika vokasionál agríkola Natarbora total professor hamutuk na’in 37, kompostu hosi mane 25, feto nain 2, professor tempo parsial feto na’in 1, Funsionário administrasaun públiku hamutuk na’in 6, mane na’i 5, feto nain 1, Funsionáriu kontratadu termu sertu hamutuk na’in 2, mane na’in 1, feto na’in 1, funsionariu kontratadu kazuais feto na’in 1.
Total estudante ba anu letivu 2025 hamutuk na’in 125 kompostu hosi primeiru 1° ano na’in 60, mane na’in 48 feto na’in 12. 2° ano hamutuk na’in 26, mane na’in 19, feto na’in 7. No 3° ano na’in 39, mane na’in 26, no feto na’in 3.
Eskola téknika vokasionál agríkola Natarbora sei menus profesór liliu iha matéria jerál sira ho nune’e sira presiza tan profesór matéria jerál atu hodi kompleta ba metas sira.
#MédiaME
