𝐄𝐊𝐈𝐏𝐀 𝐌É𝐃𝐈𝐀 𝐇𝐔𝐒𝐈 𝐌𝐈𝐍𝐈𝐒𝐓É𝐑𝐈𝐔 𝐄𝐃𝐔𝐊𝐀𝐒𝐀𝐔𝐍 𝐏𝐀𝐑𝐓𝐈𝐒𝐈𝐏𝐀 𝐈𝐇𝐀 𝐅𝐎𝐑𝐌𝐀𝐒𝐀𝐔𝐍 𝐉𝐎𝐑𝐍𝐀𝐋𝐈𝐙𝐌𝐔

Dili – Loron Kinta-Feira, 10 Abril 2025

Ministériu Edukasaun, liuhusi Diresaun Nasionál Sistema Informátika no Teknologia (DNSIT) no Gabinete Relasaun Públika no Protokolu (GRPP), hamutuk ema na’in 37, partisipa iha formasaun kona-ba jornalizmu, atu hasa’e liután koñesimentu kona-ba hakerek notísia, bazeia ba atividade ne’ebé mak la’o iha Ministériu Edukasaun. Formasaun ne’e realiza iha Sala Konferénsia Ministériu Edukasaun.

Antes atu hahú atividade formasaun ne’e, Sua Exelénsia Ministra Edukasaun, Dra. Dulce de Jesus Soares, hateten, formasaun ne’e, atu fahe esperiénsia oituan kona-ba oinsá hakerek notísia ho di’ak, no liuliu ba sira ne’ebé halo servisu média, atu bele kompriende didi’ak antes hakerek.

“Ibu Madhavi mai atu fahe nia esperiénsia oituan, liuliu joven sira ne’ebé hala’o servisu iha média, importante atu rona oituan, kona-ba oinsá mak servisu iha média no oinsá mak hakerek notísia hodi fó sai ba públiku”, dehan S.E. Ministra Edukasaun.

Iha introdusuan, Dra. Madhavi Atrai Johnson, hateten, papél média importante tebes atu ita fahe informasaun sira ba públiku, tanba ne’e, formasaun ne’ebé maka sei fahe, importante tebes no koko kompriende atu iha futuru bele hakerek ho di’ak.

"Orgullu tebes ho imi hotu nia prezensa, husi ne’e, hatene katak, imi hakarak tebes atu aprende liuhusi formasaun ne'ebé maka ha’u fahe, espera matéria sira ne’ebé fó bele sai importante ba imi no koko ko’alia ho neneik atu imi bele kompriende ho di’ak liután”, dehan Dra. Madhavi.

#MédiaME