𝐌𝐈𝐍𝐈𝐒𝐓𝐑𝐀 𝐄𝐃𝐔𝐊𝐀𝐒𝐀𝐔𝐍 𝐏𝐀𝐑𝐓𝐈𝐒𝐈𝐏𝐀 𝐈𝐇𝐀 𝐑𝐄𝐔𝐍𝐈𝐀𝐔𝐍 𝐉𝐎𝐑𝐍𝐀𝐃𝐀 𝐎𝐑𝐒𝐀𝐌𝐄𝐍𝐓Á𝐋 𝐓𝐈𝐍𝐀𝐍 𝟐𝟎𝟐𝟔

Díli, 13 Juñu 2025 - Sua Exelénsia Ministra Edukasaun Dra. Dulce de Jesus Soares, partisipa iha reuniaun kona-ba Jornada Orsamentál tinan 2026, ho tema, "Otimiza Rezultadu ho Despeza Realístiku sira", ho objetivu, atu permite Governu halo análiza prioridade nasionál sira, define senáriu no tetu fiskál ba ezersísiu tinan 2026 nian.

Iha reuniaun ne'e, Sua Exelénsia Ministra Finansas, Santina Viegas Cardoso, hateten, prepasaun orsamentu Jerál ba tinan 2026, la’os de’it ezersísiu tékniku ida kona-ba alokasaun rekursu, maibé inklui mós Timor-Leste nia vizaun ba dezenvolvimentu ida kontínua no mós hanesan komprimísiu atu hadi'a moris sidadaun sira-nian.

"Ita-nia sorumutu ohin, lori hamutuk entidade relevante tomak, hodi diskuti, hodi forma ita-nia prioridade orsamentál ba tinan 2026, hodi demonstra abordajen kolaborativu ne'ebé presiza, hodi prepara orsamentu ne'ebé serví duni ba povu tomak, no mós bele garante efisiénsia no efikás iha despeza públika", dehan S.E. Ministra Finansas.

Sesaun ne’e hahú iha tuku 9:40, no sei iha aprezentasaun oin-oin hosi Ministériu Finansas, inklui panorámika ida kona-ba kontestu makroekonómiku no sosiál, análiza dezempeñu reseita nian sira iha tinan hirak liubá, no panorama fiskál. Aprezentasaun sira-ne'e sei kontinua to'o tuku 11:30. Hafoin deskansa almosu nian, entre tuku 12:30 no tuku 14:00, sesaun hahú fali ho aprezentasaun foun tolu hosi Ministériu Finansas, ne'ebé foka liu ba dezempeñu hosi despeza sira iha tinan hirak liubá, despeza obrigatória sira no senáriu fiskál indikativu ba tinan 2026. Husi tuku 3:00 to’o tuku 5:15 lokraik, sei iha espasu diskusaun entre partisipante sira. Sesaun jornada orsamentál ne’e sei remata iha tuku 5:30 lokraik.

#MédiaME