𝐏𝐑𝐄𝐙𝐈𝐃𝐄𝐍𝐓𝐄 𝐑𝐄𝐏Ú𝐁𝐋𝐈𝐊𝐀 𝐈𝐍𝐀𝐔𝐆𝐔𝐑𝐀 𝐌𝐈𝐍𝐈-𝐉𝐀𝐑𝐃𝐈𝐍 𝐙𝐎𝐎𝐋Ó𝐉𝐈𝐊𝐔 𝐅𝐎𝐔𝐍 𝐈𝐇𝐀 𝐑𝐄𝐒𝐈𝐍𝐓𝐔 𝐏𝐀𝐋Á𝐒𝐈𝐔 𝐏𝐑𝐄𝐙𝐈𝐃𝐄𝐍𝐓𝐄

Díli, 23 setembru 2025

Sua Exelénsia Ministra Edukasaun, Dra. Dulce de Jesus Soares, partisipa iha serimónia inaugurasaun Mini-Jardin Zoolójiku foun iha resintu Palásiu Prezidensiál Nicolau Lobato, ho objetivu atu promove edukasaun ambientál no konserva animál fuik sira railaran.

Iha serimónia ne’e, Sua Exelénsia Prezidente Repúblika, Dr. José Ramos Horta, hateten, inisiativa foun ne’e estabelese sentru ida ba edukasaun, rekreasaun no konservasaun, hodi oferese ba públiku – liuliu labarik sira – oportunidade ida atu konekta ho animál lokál no doméstiku. Mini-Jardín Zoolójiku ne’e dezeña atu fornese esperiénsia prátika ne’ebé promove empatia, kuidadu no respeitu ba natureza hahú husi idade ki’ik.

“Liuhusi Mini Zoolójiku ida-ne’e, ita konekta ita-nia oan sira ba natureza, fornese edukasaun no haburas respeitu ba ita-nia animál nian moris.

Ida-ne’e hanesan promesa ida ba futuru, katak ita sei hapara kapturasaun ba ita-nia manu fuik sira no aprende atu hadomi sira, hodi garante katak jerasaun tuirmai sei sai guardia ba Timor-Leste ne’ebé riku no diversu liután”, dehan S. E. PR.

Sua Exelénsia Prezidente Repúblika mós husu ba públiku atu hadook an husi oho ka kaptura arbiru animál fuik sira. respeita no proteje nafatin animál sira hodi bele buras liután.

#jornalistaluisalmeida
#MédiaME