Dili, loron 08 fulan Janeiro 2026- Sua Exelénsia Ministru Edukasaun Interinu Sr. Domingos Lopes Lemos akompaña husi Diretór Jerál Ensinu Sr. Deolindo da Cruz, Diretór Nasionál ESTV Sr.Fernando Mouzinho Gama, KordenadÓr Gabinete Avaliasaun Dezenvolvimentu Kurríkulu no Rekursu Pedagójiku Sr. João Mau Pelo no Koordenadór Gabinete Avaliasaun Lisensiamentu no Akreditasaun (GALA) Sr. António Tomás Maia halo vizita ba eskola Sekundária Jerál Tékniku Vokasionál Henricus leven Rio de Janeiro, Bairru Pite, Díli kinta-feira ne’e.
Iha vizita ne’e Koordenadór Gabinete Avaliasaun Lisensiamentu no Akreditasaun (GALA) Sr. António Tomás Maia, iha entrevista hateten, ekipa mai vizita hodi haree diretamente eskola refere, tamba eskola ida-ne’e iha hela prosesu aplikasaun ba lisensiamentu operasionál.
"Iha buat lubuk ida mak ita halo serbisu hamutuk, sira konsege kompleta, sira-nia kestaun maka seidauk iha kurrikulu relevante liu-liu ba iha área Saúde ninian entaun iha-ne’e unidade kurríkulu ho eskola konsege serbisu hamutuk, konklui no halo elaborasaun ba kurrikulu ne’ebé agora iha ona faze finalidade no tuir mai iha prosesu aprendizajen. Vizita ida ne’e mós atu haree kondisaun atuál iha-ne’e nia progresu to'o iha-ne’e, atu nune’e bele hakat ba prosesu oinsá atu bele halo avaliasaun no bele haree ba prosesu ikus atu atribui ba lisensiamentu operasionál ba eskola refere", esplika Koordenadór ne’e.
Fatin hanesan Sua Exelénsia Ministru Edukasaun Interinu Sr.Domingos Lopes dehan, Ministériu Edukasaun prontu servisu hamutuk ho eskola nune’e bele hetan solusaun di'ak. Espera katak bele kordena malu nafatin, ho kompromisu ida katak loke eskola hodi dezenvolve rai ida-ne’e.
#JornalistaRita
#MédiaME
#J.Amaral
