Dili, 12 Dezembru 2025
Sua Exelénsia Ministra Edukasaun, Dra. Dulce de Jesus Soares, hanesan mós Membru Konsellu Jerál UNTL, partisipa iha Audisaun Públika ba Programa no Planu Asaun husi Kandidatu Admitidu ba Kargu Reitór UNTL ba Periódu 2026-2031, iha Kampus Enjenaria Hera.
Iha abertura, Sua Exelénsia Ministro Ensinu Superiór Siénsia no Kultura, Dr. José Honório da Costa Pereira Jerónimo, hateten, agradese, tanba bele iha kandidatu ba reitór hamutuk na’in 12, tanba eleisaun ne’e importante ba UNTL no tenki rekoñese katak UNTL ne’e iha problema barak, tanba problema kikoan sira ne’ebé mosu lakohi rezolve. Tanba ne’e reitór ida mai, tenki reitór ida di’ak atu bele lori UNTL ba oin.
“Reitór ida mai, tenki reitór ida di’ak, tenki tau ema matenek iha estrutura, reitór ida labele mai fali ho hanoin sira klo’ot liu, familiarizmu, sukuizmu, partidarizmu ne’e labele iha. Universidade ne’e labele iha ona modelu hanesan ne’e, Universidade tenki aponta ona ba interese nasionál, tanba ne’e reitór ida mai tenki brani halo desizaun”, dehan S. E. Ministru MESCC.
Iha serimónia ne’e, Sua Exelénsia Ministra Edukasaun, Dra. Dulce de Jesus Soares, hanesan reprezentante Konsellu Ministru, fó parabéns ba Universidade Nacional Timor-Lorosa’e (UNTL), tanba graduadu barak ona mak serví rai ida ne’e, tanba ne’e nafatin halo UNTL sai fatin ida matenek nian, seguru no fatin amigavel. Parabéns ba kandidatu sira, nafatin servisu hamutuk hodi lori UNTL ba oin.
“Ha’u hanoin katak importante liu, hafoin rona esperiénsia, dezafiu ne’ebé mak UNTL hasoru, katak UNTL la la’o mesak, maibé hamutuk ho governu hodi buka rezolve problema hirak ne’e, tanba UNTL hanesan Universidade ida ne’ebé estatal no úniku iha Timor-Leste”, dehan S. E. Ministra Edukasaun.
Kandidatu ba Reitór Universidade Nasionál Timor-Lorosa’e UNTL nian, hamutuk ema na’in 12. Nune’e, iha loron ikus ba votasaun ne’e, Doutór Joviano António da Costa, mak sai hanesan Reitór eleitu ba periódu 2026-2031 ho totál votu hamutuk 9, iha ronde daruak votasaun nian.
#MédiaME
