Ermera, 11 Setembru 2025 – Sua Exelénsia Ministra Edukasaun, Dulce de Jesus Soares, akompaña Sua Exelénsia Prezidente Repúblika, Dr. José Ramos-Horta, hala’o vizita ba estudante, manorin, komunidade, inklui inagura uma ba família kbiit-laek ne’ebé apoiu husi Prezidénsia Repúblika no mós fahe sasan ba kbiit –laek sira, iha Suku Lasaun, Postu Administrativu Atsabe, Munisípiu Ermera.
Vizita ne’e ho objetivu atu haree direta kondisaun real ne’ebé komunidade, estudante no manorin sira hasoru, liuliu apoiu oan ki’ak sira atu bele asesu ba eskola hanesan labarik sira seluk.
Iha vizita ne’e, Sua Exelénsia Ministra Edukasaun, husu ba manorin sira halo jestaun ba biblioteka, sala-aula ho didi’ak, liuliu fahe livru ba estudante sira atu estuda hodi sira bele prepara-an didi’ak antes partisipa iha aprendizajen no autoriza estudante sira atu lori livru ba uma liuhusi impresta hodi nune’e, inan-aman mós bele akonpaña oan sira lee, nune’e bele reforsa liután oan sira-nia literasia no numerasia.
“Livru sira ne’ebé mak Ministériu Edukasaun kada tinan fahe ba eskola sira, favór ida fahe tutan fali ba estudante sira hodi lee, tanba livru hirak ne’e ba duni estudante sira, fó impresta ba estudante sira atu lori ba uma, nune’e inan-aman sira mós bele akompaña oan sira lee iha uma, tanba Ministériu Edukasaun de’it labele, manorin sira de’it mós labele, maibé presiza komunidade edukativa tomak nia apoiu hodi bele garante oan sira-nia dezenvolvimentu iha futuru”, dehan S. E Ministra Edukasaun.
Governante ne’e mós husu atensaun dirijente no manorin sira-nian atu bele halo jestaun ba sala-aula bazeia ba formasaun ne’e hetan ona, atu nune’e estudante sira bele iha vontade aprende no buka dezenvolve sira-nia an liuhusi meiu hotu ne’ebé manorin sira kria iha sala-laran.
#MédiaME
