Dili, 02 Dezembru 2025
Sua Exelénsia Ministra Edukasaun, Dra. Dulce de Jesus Soares, akompaña husi dirijente sira Ministériu Edukasaun nia, halo enkontru ho Embaxadora Filipina mai Timor-Leste, Mary Anne Padua, hodi ko’alia kona-ba estabelesimentu eskola Filipina ne’ebé dadaun ne’e la’o hela iha rai-laran, atu bele prienxe rekezitu sira ne’ebé mak estabelese ona.
Hafoin remata enkontru, Diretor Gabinete Avaliasaun Lisensiamentu Akreditasaun (GALA), António Tomás Maia, hateten, ohin enkontru entre Ministériu Edukasaun ho Embaxadora Filipina mai Timor-Leste, Mary Anne Padua, hodi ko-alia kona-ba eskola iternasionál sira liuliu eskola Filipina ne’ebé estabelese iha Timor-Leste, atu oinsá mak eskola sira ne’e bele prienxe rekezitu sira hotu ne’ebé estabelese iha nasaun ne’e.
“Iha eskola sira ne’e hahú husi nivel Pré-Eskolár ba to’o iha Sekundáriu. Ministériu Edukasaun nia parte mak oinsá atu bele haree no monitoriza eskola sira ne’e, nune’e sira bele mantein kondisaun ne’ebé di’ak liuliu oinsá atu bele prienxe rekezitu sira tuir ita-nia lei ejize”, dehan Diretór GALA.
Dirijente ne’e hatutan, estudante sekundáriu ne’ebé mak remata iha eskola Filipina, sira tenke prienxe rekezitu no sira tenki iha lisensimentu operasionál no aprezenta rezultadu akreditasaun husi institusaun estranjeru ne’ebé mak autoriza sira uza sira-nia kurrikulu, nune’e Ministériu bele haree no halo rekoñesementu, nune’e validade diploma eskola sira-nian bele rekoñese iha ne’ebé de’it. Enkuantu sira hetan ona lisensiamentu, maibé sira sedauk hetan akreditasaun ne’e sai problema bo’ot ida ba sira no sei laiha validade bainhira sira ba kontinua iha Ensinu Superior.
#MédiaME
