Dili, 01 Dezembru 2025
Sua Exelénsia Ministra Edukasaun, Dra. Dulce de Jesus Soares, elojia estudante sira-nia kontribuisaun iha isár Bandeira ba Komemorasaun tinan-50 Proklamasaun Unilaterál Independénsia no propoin sertifikadu rekoñesimentu ba sira hotu. Deklarasaun ne'e Sua Exelénsia Ministra Edukasaun hato'o, bainhira sai Inpetora ba Serimónia Isár Bandeira RDTL ba inísiu fulan Dezembru 2025, iha resintu Ministériu Edukasaun, Vila-Verde.
Iha diskursu, Sua Exelénsia Ministra Edukasaun, Dra. Dulce de Jesus Soares, hateten, orgullu tebes ho estudante sira-nia partisipasaun iha ámbitu Komemorasaun tinan 50 Proklamasaun Unilaterál Independénsia, hanesan korpu isár Bandeira, hahú husi Munisípiu to'o Postu-Administrativu sira. Ida ne'e hanesan prestasaun ida ne'ebé mak sira iha.
"Dalabarak ema haree estudante sira sempre iha problema, maibé iha loron nasionál sira, sira mak pesoál ida ne'ebé sempre halo servisu ida ne'ebé boot tebetebes hodi kaer Bandeira Nasionál iha territóriu tomak", dehan S. E. Ministra Edukasaun.
Governante ne akresenta, preparasaun ba isár Bandeira ne'e la'os fasil, tanba presiza ema-nia seriedade, atensaun, konsentrasaun no disiplina. Tanba ne'e, sei aprezenta iha Reuniaun Konsellu Ministru, nune'e Ministériu Administrasaun Estatal ne'ebé sai hanesan Komisaun Organizadora ba eventu ida ne'e, bele fó sertifikadu rekoñesimentu ida ba estudante hotu ne'ebé mak hola parte iha isár Bandeira.
Iha àmbitu isár bandeira ne'e, Sua Exelénsia Ministra Edukasaun, Dra. Dulce de Jesus Soares, mós fó sentidu kondolénsia no solidariedade ba família husi vítima estudante feto na'in 4 iha RAEOA, ne'ebé mout iha mota. Situasaun ne'e, bolu atensaun ba ita hotu no mós komunidade edukativa hotu atu tau atensaun ba oan sira bainhira iha tempu udan hodi bele hases sira husi fatin risku.
#MédiaME
