𝐌𝐄 𝐓𝐔𝐋𝐔𝐍 𝐅𝐀𝐌Í𝐋𝐈𝐀 𝐕𝐔𝐋𝐍𝐄𝐑Á𝐕𝐄𝐋 𝐇𝐎𝐃𝐈 𝐀𝐒𝐄𝐒𝐔 𝐁𝐀 𝐄𝐃𝐔𝐊𝐀𝐒𝐀𝐔𝐍

Díli, Tersa-feira, 18/03/2025

Ministériu Edukasaun liu husi Diretór Jerál Edukasaun Pré-Eskolár, Ensinu Báziku no Ensinu Rekorente (DG EPEBER) Sr. Apolinário Serpa Rosa hamutuk ho dirijente Ministériu Edukasaun nian aprosima hodi tulun Família Vulnerável nia oan ba Eskola EBF No. 5 Comoro hodi asesu ba Edukasaun.

Iha vizita ne’e, DG EPEBER Sr. Apolinário Serpa Rosa ba Jornalista hateten, "objetivu prinsipal vizita iha eskola ida ne’e maka atu tulun ita nia alin, Tome de Deus ne’ebé idade tinan 8 ona maibé seidauk asesu ba edukasaun tamba situasaun família ne’ebé vulnerável tebes. Tamba ne’e mak Ministériu Edukasaun fó apoiu ba labarik sira ne’ebé mak seidauk asesu ba edukasaun, atu hakbi’it sira nia futuru”.

“Maske nia tinan 8 ona eskola tarde oituan maibé laiha buat ida, nia bele mai hamutuk ho nia maluk sira iha eskola EBF No. 5 Comoro hodi bele asesu edukasaun Ensinu Báziku”. Dehan DG EPEBER.

Diretór Jerál ne’e, akresenta, “Ministériu Edukasaun kontinua ho polítika atu prevene kazu hanesan ne’e, ho objetivu atu garante katak labarik sira hotu-hotu hetan direitu ba edukasaun, hanesan hakerek iha konstituisaun RDTL artigu 59.

#MédiaME-JornalistaEmilio