𝙀𝘽𝙁 𝙉𝙊. 1, 2 𝙑𝙄𝙇𝘼-𝙑𝙀𝙍𝘿𝙀 𝙃𝙀𝙏𝘼𝙉 𝘼𝙁𝙀𝙏𝘼𝘿𝙐 𝘽𝘼 𝙄𝙉𝙐𝙉𝘿𝘼𝙎𝘼𝙐𝙉

Dili - Loron Segunda-feira, 17 Marsu 2025

Eskola Ensinu Báziku Filiál No. 2 Vila-Verde hetan afetadu husi inundasaun, tanba kauza husi udan bo'ot ne'ebé akontese durante oras balun nia laran, hodi afeta ba estudante sira-nia prosesu aprendizajen iha aula-laran. Hafoin akontese inundasaun, dirijente husi Ministériu Eduksaun to’o kedas iha fatin hodi haree situasaun ne’ebé eskola ne’e enfrenta.

Iha biban ne’e koordenadora EBF No.1, 2 Vila-Verde Sra. Filomena Casemira, informa katak iha tempu udan prejudika tebes estudante sira atu labele tuir prosesu aprendizajen, tanba bee nalihun tama to’o areadór eskola nian, tanba bee-dalan ne’ebé liga husi eskola sai ba liur entupidu metin, Señora Kordenadora sujere atu hadi’a lalais tiha bee dalan ne’e, atu estudante sira bele avontade bainhira tuir prosesu aprendizajen.

"Daudaun ne’e tempu udan, tanba ne’e, presiza tebes apoiu hodi hadi'a bee-dalan ne’e, tanba rai ne’e ita haree kle’an hodi halo bee sai ladi’ak. Maibé estudante sira kontinua nafatin sira-nia aprendizajen maske prejudika tebes estudante sira. Hanesan responsável eskola, husu atu ita tula liman hamutuk hodi rezolve beedalan ne'e sai lalais, nune’e estudante sira bele hala’o sira-nia aprendizajen ho di’ak". dehan Koordenadora Eskola.

Iha fatin hanesan, Diretór Jerál Edukasaun Pré-Eskolár, Ensinu Báziku no Ensinu Rekorrente, Sr. Apolinário Serpa Rosa hateten, ohin loron tomak kuaze udan bo'ot, nune’e afeta tebes ba estudante sira-nia prosesu aprendizajen, tanba udan halo bee nalihun iha areadór eskola nian.

"Ohin ami mai direta hodi haree, katak ita presiza loke bee-dalan para oinsá bee atu sai husi areadór eskola bainhira iha tempu udan, nune’e ita orienta ona kordenadora EBF Vila-Verde atu tuur hamutuk hodi rezolve situasaun ida ne’e". dehan DGEPEBER-ME.

Dirijente Ministériu Edukasaun ne'e hatutan, osan konsensaun sira ne’ebé iha, koordenadora bele jere halo didi’ak, hodi bele uza ba hadi’a bee-dalan ne’e, atu iha tempu udan labele afeta tán ba prosesu aprendizajen estudante sira-nian.

#MédiaME