Liquiça, 23, Agostu 2025 – Governu Konstitusionál da-9, liuhosi Sua Exelénsia Ministra Edukasaun, Dra. Dulce de Jesus Soares, hamutuk ho Sua Exelénsia Ministru Transporte no Telekomunikasaun, Sr. Miguel Marques Gonçalves Manetelu, Sua Exelénsia Sekretáriu Estadu Komunikasaun Sosiál, Sr. Expedito Dias Ximenes no dirijente sira hotu, halo lansamentu ofisiál ba Projetu Kooperasaun ho INTELSAT (International Telecommunication Satellite) no Jornal Parede Dijitál ba eskola 5. Lansamentu ne’e realiza iha Eskola Santu Inácio de Loiola Cassait, Munisípiu Liquiça, Sábadu ne’e.
Iha Diskursu, Sua Exelénsia Ministra Edukasaun, Dra. Dulce de Jesus Soares, hateten, agradese wa’in ba Ministériu Transporte no Telekomunikasaun tanba, arranja internet ida-ne’e, no fiar katak ho kolaborasaun metin sei bele kontinua instala internet iha eskola sira seluk. Ministériu Edukasaun iha kompromisu boot atu prepara estudante sira ba moris iha mundu ida-ne’e, liuhosi hanorin no dezenvolve abilidade, inklui literasia dijitál.
“Ha’u kontente atu haree estudante sira rasik mak hakerek notísia, no hein katak estudante sira rasik mak dezeña no kria website ne’e. Ha’u agradese tebes kolaborasaun ida-ne’e ho SEKOMS, tanba atu ita-nia nasaun iha jornalista sira-ne’ebé di’ak, presiza sira hatene hakerek ho didi’ak, no kompeténsia ida-ne’e tenke dezenvolve dezde sei ki’ik”, dehan S. E. Ministra Edukasaun.
Governante ne’e hatutan, uza kriatividade atu hakerek kona-ba buat ne’ebé interesante no iha maneira ne’ebé kaptiva ema. Uza abilidade atu buka-hatene saida mak akontese ho loloos hodi bele hakerek ho loloos. No uza hanoin-krítiku atu deside saida mak di’ak atu publika no saida mak lalika. Fiar katak eskola ida-idak sei dezeña ninia jornál parede dijitál ho furak no kriativu, atu atrai ema no mós promove imi-nia eskola.
#jornalistaluisalmeida
#ortografiajoanicodejesus
#ortografiahipolita
#traduçãojoaoamaral
#MédiaME
