𝙈𝙄𝙉𝙄𝙎𝙏É𝙍𝙄𝙐 𝙀𝘿𝙐𝙆𝘼𝙎𝘼𝙐𝙉 𝙃𝘼𝙇𝙊 𝙒𝙊𝙍𝙆𝙎𝙃𝙊𝙋 𝘽𝘼 𝙅𝙊𝙍𝙉𝘼𝙇𝙄𝙎𝙏𝘼 𝙎𝙄𝙍𝘼 𝘼𝙏𝙐 𝙀𝙎𝙋𝙇𝙄𝙆𝘼 𝙀𝙉𝙆𝙐𝘼𝘿𝙍𝘼𝙈𝙀𝙉𝙏𝙐 𝙅𝙐𝙍Í𝘿𝙄𝙆𝙐 𝙄𝙃𝘼 Á𝙍𝙀𝘼 𝙀𝘿𝙐𝙆𝘼𝙎𝘼𝙐𝙉

Díli, 9 de Maiu 2025 – Ministériu Edukasaun halo semináriu ida ba jornalista sira iha loron 9 de Maiu atu partilha informasaun relevante kona-ba sistema edukasaun no enkuadramentu jurídiku ne’ebé sustenta prosesu edukativu iha Timor-Leste.

Workshop ne’e envolve jornalista sira husi média oin-oin, inklui televizaun, rádiu no jornál, ho objetivu atu fó esplikasaun klaru kona-ba estrutura sistema edukasaun, kuadru pesoál eskola sira, rejime karreira dosente no prosedimentu rekrutamentu liuhosi Bolsa Kandidatu.

Diretór Relasaun Públika no Protokolu Ministériu Edukasaun, Sr. Olandino Godinho Serqueira, hateten, katak workshop ne’e importante tebes ba jornalista sira atu kompriende legalidade no prosedimentu iha área edukasaun, hodi bele realiza serbisu jornalístiku ne’ebé bazeia ba informasaun ne’ebé los.

"Ita fó oportunidade ba jornalista sira atu husu klarifikasaun kona-ba kestaun ne’ebé duni mosu dala barak iha notísia sira," dehan Sr. Olandino.

Entre asuntu relevante sira workshop nian fó énfaze ba idade ba tama eskola, falta profesór, no kolokasaun liuhosi Bolsa Kandidatu. Tuir Lei Baze Edukasaun, labarik bele tama iha ensinu báziku bainhira kompleta tinan 6 molok hahú tinan eskola. Ministériu hateten katak eskola sira agora hetan informasaun klaru no manuál atu halo matríkula tuir kuadru legál.

Fasilitadora workshop nian, jurista Dra. Bárbara Oliveira, fó klarifikasaun kona-ba kuadru pesoál mak determina profesór hira mak eskola ida presiza, depende ba nível ensinu, kurríkulu, karga orária, númeru estudante no turma. Tinan 2024 Ministériu aprova ona kuadru pesoál ba eskola ensinu báziku no pré-eskola públiku.

“Sira ne’ebé iha lista ne’e sei kolokadu bazeia ba méritu, no presiza hein xamada bainhira iha vaga. Iha 2024 halo ona Bolsa ba Pré-Eskola no Siklu 3, no agora sei iha hela kandidatu ba Siklu 1 no 2”, dehan Fasilitadora.

Despaxu Ministeriál Nú. 05/2025 de 13 de fevereiru rejista 1.259 kandidatu iha Bolsa, inklui feto 766. Iha fulan Maiu ne’e, Ministériu espera halo xamada ba 150 resin atu taka vaga hosi dosente ne’ebé reforma no mate. Iha 2026, Ministériu iha esperansa katak sei xama kandidatu hotu iha Bolsa atuál.

Workshop refere partisipa hosi instituisaun média sira hamtuk 13, inklui jornalista 26 (feto 12), no funsionáriu tékniku sira hosi rekursu umanu, protokolu, média no jurídiku.

#MédiaME