Ainaro – 23 jullu 2026
Dirijente Ministériu Edukasaun liuhosi Gabine Formasaun Profisionál no Kontínua husi Institutu Nasionál Formasaun Dosente no Profisionál Edukasaun, Diretora Héldera G. C e Silva, observa direta formandu sira halo prátika simulasaun ba alunu klase 8 iha Eskola Ensinu Báziku Sentrál Siklu 3 Venâncio Ferraz, postu Administrativu Ainaro, Munisípiu Ainaro.
Atividade ne’e hanesan kontinuasaun loron daruak ba formasaun reforma kurríkulu ensinu báziku klase 8 nian ba profesór sira. “Simulasaun ida-ne’e, ami hakarak haree kompeténsia 5 ne’e, formandu sira uza dunik hodi hanorin iha klase laran ka lae”, dehan Diretora Héldera.
Nia esplika, kompeténsia 5 ne’ebé mak sai alvu prinsipál iha observasaun ida-ne’e hanesan Investigasaun, Kolaborasaun, Pensamentu krítiku, Kriatividade no Komunikasaun, formandu sira aplika dunik iha sala ka lae. Kuandu sira prátika, signifika profesór sira bele implementa iha terenu no halo tuir dunik guiaun ne’ebé iha.
Iha fatin hanesan, formadora ba dixiplina Fraternidade Umana, Morál no Étika, Fidélia S. O. da Cruz, hafoin prátika simulasaun haktuir katak, durante loron tomak, nu’udar formadora observa kapas tebes tanba formandu sira konsege prátika tuir dunik matadalan ne’ebé mak iha ona, maske balu ladun domina di’ak, maibé enijerál konsidera bele dehan sira balu bele ona.
Formadora Fidélia halo komparasaun kurríkulu tuan ho foun dau-dauk ne’e, kurríkulu tuan sentradu ba profesór, maibé ho reforma kurríkulu ida-ne’e adapta ba sékulu XXI nian, nune’e tenke sentradu iha alunu sira. Tanba nee mak nu’udar profesór nia papel atu orienta no akompaña alunu sira iha klase laran.
Nune’e mós, Formandu João Martins de Araújo, manorin husi EBC Maulau, Maubisse afirma katak, ho prátika simulasaun ohin nian sente kontente tanba bele hetan esperiénsia foun tanba métodu sentradu ba alunu sira no nu’udar profesór iha sala laran para kompleta de’it konteúdu sira-ne’ebé estudante sira deskuti iha sala laran.
Partisipante sira hamutuk 94 kompostu husi profesór dixiplina Lian Tetun 31 (F. 19 no M. 12), profesór dixiplina Siénsias Sosiais 31 (F. 14 no M. 17) no profesór dixiplina Fraternidade Humana 32 (F. 12 no M. 20) mai husi EBC públiku 18, EBF 8 no EBC Katólika 4 iha Munisípiu Ainaro.
#MédiaME.
