𝐌𝐈𝐍𝐈𝐒𝐓𝐑𝐀 𝐄𝐃𝐔𝐊𝐀𝐒𝐀𝐔𝐍 𝐏𝐀𝐑𝐀𝐁𝐄𝐍𝐈𝐙𝐀 𝐃𝐈𝐑𝐈𝐉𝐄𝐍𝐓𝐄 𝐍𝐎 𝐏𝐑𝐎𝐅𝐄𝐒Ó𝐑 𝐒𝐈𝐑𝐀 𝐈𝐇𝐀 𝐄𝐒𝐊𝐎𝐋𝐀 𝐀𝐂𝐀𝐍𝐔𝐍𝐎 𝐇𝐄𝐑𝐀

𝐇𝐞𝐫𝐚, 𝟏𝟕 𝐉𝐮ñ𝐮 𝟐𝟎𝟐𝟓 – 𝐒𝐮𝐚 𝐄𝐱𝐞𝐥é𝐧𝐬𝐢𝐚 𝐌𝐢𝐧𝐢𝐬𝐭𝐫𝐚 𝐄𝐝𝐮𝐤𝐚𝐬𝐚𝐮𝐧, 𝐃𝐫𝐚. 𝐃𝐮𝐥𝐜𝐞 𝐝𝐞 𝐉𝐞𝐬𝐮𝐬 𝐒𝐨𝐚𝐫𝐞𝐬, 𝐡𝐚𝐭𝐨’𝐨 𝐩𝐚𝐫𝐚𝐛é𝐧𝐬 𝐧𝐨 𝐚𝐠𝐫𝐚𝐝𝐞𝐬𝐞 𝐛𝐚 𝐝𝐢𝐫𝐢𝐣𝐞𝐧𝐭𝐞 𝐧𝐨 𝐏𝐫𝐨𝐟𝐞𝐬ó𝐫 𝐬𝐢𝐫𝐚 𝐢𝐡𝐚 𝐄𝐬𝐤𝐨𝐥𝐚 𝐄𝐧𝐬𝐢𝐧𝐮 𝐁á𝐳𝐢𝐤𝐮 𝐅𝐢𝐥𝐢á𝐥 𝐀𝐜𝐚𝐧𝐮𝐧𝐨 𝐇𝐞𝐫𝐚, 𝐭𝐚𝐧𝐛𝐚 𝐬𝐢𝐫𝐚-𝐧𝐢𝐚 𝐝𝐞𝐝𝐢𝐤𝐚𝐬𝐚𝐮𝐧 𝐛𝐨𝐨𝐭 𝐡𝐨𝐝𝐢 𝐡𝐚𝐧𝐨𝐫𝐢𝐧 𝐞𝐬𝐭𝐮𝐝𝐚𝐧𝐭𝐞 𝐬𝐢𝐫𝐚 𝐡𝐨 𝐝𝐢'𝐚𝐤 𝐧𝐨 𝐡𝐚𝐥𝐚'𝐨 𝐣𝐞𝐬𝐭𝐚𝐮𝐧 𝐞𝐬𝐤𝐨𝐥𝐚 𝐧𝐞’𝐞𝐛é 𝐩𝐫𝐨𝐟𝐢𝐬𝐢𝐨𝐧á𝐥.

Iha vizita ne’e, Sua Exelénsia Ministra Edukasaun, Dra. Dulce de Jesus Soares, observa progresu ne'ebé Eskola Acanuno hetan, inklui implementasaun Jardín Eskola, to'os eskolár, merenda eskolár, no jestaun sala aula ne’ebé tuir padraun kurrikulár estabelesidu husi Ministériu Edukasaun.

“Ami bele haree kapasidade no organizasaun ne’ebé Ita-Boot sira halo iha eskola ida-ne’e. Eskola iha-nia to’os rasik, merenda eskolár, no ambiente aprende ne’ebé favorável. Ha'u kontente tebes, tanba iha lideransa ne’ebé fó ezemplu di'ak ba eskola seluk,” hateten S.E. Ministra.

Governante ne’e mós husu ba dirijente no profesór sira atu kontinua akompaña estudante sira ho atensaun no dedikasaun, hodi fó ambiente aprende ne’ebé motivante no efikáz. Nune’e, estudante sira bele sente konfortável no motivadu hodi kontinua sira-nia prosesu aprendizajen.

#JornalistaLuísAlmeida
#MédiaME