Programa Intensivu nia objetivu mak atu fornese esperiénsia edukasaun sedu ba labarik sira ho idade 5 to’o 7 ne’ebé la hetan oportunidade asesu ba edukasaun pre-eskolár iha sira-nia hela fatin, liu hosi implementasaun Programa Intensivu atu hasa’e susesu estudante iha nivel Pre-eskolár no Ensinu Báziku.
Iha loron 13 fulan Maiu tinan 2025, Ministériu Edukasaun, liuhosi Diresaun Nasionál Edukasaun Pre-Eskolár kopera ho parseria ho Programa HANDS (Halimar, Aprende, no Deskobre Susesu) hala’o dezamiñasaun Programa Intensivu iha Munisípiu Aileu, partisipa iha eventu ne’e mak hanesan Sekretáriu Munisipal ba asuntu Sosiais no Organizasaun Komunitária, Diretora Servisu Munisípiu Edukasaun Aileu, Administrador Postu Laulara, Administrador Postu Aileu Vila, Administrador Postu Remexio, Administrador Postu Liquidoe, no Nai Xefi Suku sira hosi suku Bandudato, Xefi Suku Lausi, Xefi Suku Fatisi, Xefi Suku Liurai, Xefi Suku Maumeta, Xefi Suku Hautoho, Xefi Suku Karahili, Xefi Suku Betulau, Xefi Suku Bereleu no Xefi Suku Faturilau.
Atividade ida ne’e abertura hosi Sekretáriu Munisipal ba asuntu Sosiais no Organizasaun Komunitária, iha nia intervensaun katak; Xefe suku sira mak nain ba programa no teknik ba prosesu dezenvolve manual no lala’ok nee nain mak edukasaun. Husu ba suku sira, atu fasilita rai ba harii eskola no Programa Intensivu ne’e, atu atividade ka programa ruma la’o ho susesu Xefi Suku sira tenki fasilita dadus no rejista labarik ho idade 0-5.
Xefi Suku sira tenki Indika fatin estratejiku hodi fasilita labarik hotu inklui labarik ho nesesidade espesial hodi asesu. Presiza komunikasaun diak entre parseiru balu ne’ebé harii eskola nune’e labele fo todan ba Governu iha tempu ikus. Husu ba Xefi Suku sira atu organiza ka informa inan-aman atu apoiu maximu ba implementasaun Programa Intensivu.
Programa ida-ne’e dezeña atu fornese oportunidade edukasaun sedu ne’ebé krusiál tebes ba labarik ho idade 5 to’o 7 ne’ebé la eskola atu aprende no prepara sira molok tama ba Eskola Bázika Atu garante katak labarik no estudante sira dezenvolve abilidade kognitivu no akadémiku, linguístiku, motora, no sosiál-emosionál liuhusi aprendizajen bazeia ba atividade lúdika, liu hosi partisipasaun iha inisiativa ida-ne’e, labarik sira kapasita ho di’ak hodi halo tranzisaun ba ensinu báziku.
Programa intensivu hala’o durante semana 15 ka kobre loron 75, tuir planu kalendariu implementasaun sei hahú iha loron 04 Agostu no konklui iha loron 26 Novembru 2025. Abordajen estruturadu ida-ne’e asegura katak labarik sira hetan esperiénsia aprendizajen ida fundamentál ho tempu ne’ebé badak, hatán ba nesesidade urjente asesu ekuitativu edukasaun sedu iha área ne’ebé ladún hetan atendimentu.
