𝙈𝙀 𝙉𝙊 𝙄𝙉𝙎𝙏𝙄𝙏𝙐𝙏𝙊 𝘾𝘼𝙈Õ𝙀𝙎 𝘼𝙎𝙄𝙉𝘼 𝙈𝙀𝙈𝙊𝙍𝘼𝙉𝘿𝙐 𝙀𝙉𝙏𝙀𝙉𝘿𝙄𝙈𝙀𝙉𝙏𝙐 𝙆𝙊𝙉𝘼-𝘽𝘼 𝙍𝙀𝘼𝘽𝙄𝙇𝙄𝙏𝘼𝙎𝘼𝙐𝙉 𝙀𝙎𝙆𝙊𝙇𝘼 𝙀𝘽𝘾 𝙁𝘼𝙍𝙊𝙇

Dili – Loron Kinta-feira, 03 Abril 2025

Ministériu Edukasaun no Institutu Camões selebra asinatura memorandu entendementu kona-ba reabilitasaun sala aula hamutuk 7 iha Eskola Ensinu Báziku Sentrál (EBC) Farol, hodi bele apoiu estudante sira, hala’o prosesu aprendizajen ho seguru.

Iha serimónia asinatura ne’e Sua Exelénsia Prezidente Repúblika, Dr. José Ramos-Horta, hateten, ohin mai iha ne’e, hamutuk ho Ministra Edukasaun no Embaixadora Portugal iha Timor-Leste, hodi partisipa iha serimónia asinatura akordu koperasaun entre Instituto Camões-Portugal no Ministériu Edukasaun kona-ba reabilitasaun sala 7 iha Eskola Ensinu Báziku Sentrál Farol.

“Portugal tau osan hamutuk 140 mil dolár amerikanu hodi bele reablita sala aula hamutuk 7 iha eskola EBC Farol ne’e, tanba eskola ne’e antigu, hahú iha tempu portugés nian, iha tinan 1972. Infraestrutura enjerál di’ak, maibé presiza hadi’a, tanba edukasaun importante tebes”, dehan S.E. PR.

Xefe estadu ne’e hatutan, ema hotu-hotu presiza buka kolabora no apoiu, nune’e bele fó benefísiu ba labarik no joven sira iha Timor-Leste no husu ba estudante sira tenki tau matan ba eskola ida ne’e, atu labele estraga odamatan, janela no sintina eskola nian, inklui labele soe lixu arbiru.

Iha fatin hanesan, Sua Exelénsia Ministra Edukasaun Dra. Dulce de Jesus Soares, hateten, ohin selebra asina memorandu entendimentu entre Governu Timor-Leste no Instituto Camões, ne'ebé loke dalan ba Institutu atu reablita sala aula iha Eskola EBC Farol, atu ajuda estudante sira hodi estuda iha ambiente ida ne’ebé seguru no protesaun.

“Hakarak lori estudante sira no profesór sira hotu nia naran, agradese ba Instituto Camões, liuhusi Embaixada Portugal, ne’ebé fó apoiu mai ita, hodi reablita sala aula iha Eskola EBC Farol no husu atu kuidadu fasilidade sira ne’e hodi utiliza ba prosesu aprendizajen”, dehan S.E. ME.

#MédiaME