Díli loron 30 fulan Outubru 2025
Sua Exelénsia Ministru Edukasaun Interinu Sr. Domingos Lopes Lemos, halo abertura enkontru Tékniku kona-ba implementasaun formasaun ne'ebé relasiona ho reforma kurrikulár klase 7 husi 3⁰ Siklu Edukasaun fundamentál ba Diretór Edukasaun Munisípiu no Superintendente sira, iha Infordepe Matadoru.
Iha Diskursu Sua Exelénsia Ministru Edukasaun Interinu Sr. Domingos Lopes Lemos, hateten edukasaun ida ho kualidade, inkluzivu aliadu ho dezafiu sira sékulu XXI nian. Reforma kurríkulu nian ne'ebé ita aprofunda ohin loron la'ós de'it atualizasaun konteúdu nian, ida-ne'e maka transformasaun pedagójika ida-ne'ebé ho objetivu atu prepara di'ak liután estudante sira ba futuru, hametin abilidade, valór, no sidadania.
"Implementasaun reforma kurríkulu ida presiza planeamentu ne'ebé rigorozu, formasaun kontinua, no koordenasaun ne'ebé efetivu entre nivel hotu-hotu administrasaun edukasionál. Tanba ne'e maka enkontru tékniku ida-ne'e hetan importánsia estratéjiku iha ne'e vizaun sira aliadu, responsabilidade sira fahe malu, no mekanizmu ne'ebé klaru define atu asegura katak formasaun ba profesór konsistente, prátiku, no sustentável".
Governante ne’e hateten, Edukasaun mak fundasaun ba Timor-Leste nia dezenvolvimentu. Susesu husi reforma ida-ne'e sei depende ba abilidade atu servisu hamutuk, atu rona profesór sira, atu apoia estudante sira, no atu envolve komunidade sira. nune'e mak bele garante katak materiál didátiku sira ba klase 7 Ensinu Báziku implementa duni iha eskola ho kualidade no inovasaun iha perkursu edukasionál tomak ba foin-sa'e sira.
#MédiaME
