Melbourne, Australia, 28 marsu – 01 abril 2024
S.E. Ministra Edukasaun Timor-Leste Dra. Dulce de Jesus Soares hasoru malu ho nian omólogu S.E. Ministru Edukasaun Austrália Dr. Ben Carroll no Vise Premiere Melbourne-Victoria ko’alia kona-ba obstákulu sira iha área edukasaun iha Timor-Leste.
Iha oportunidade ne’e deskuti mós kona-ba área posibilidade sira mak nasaun rua ne’e bele servisu hamutuk iha futuru. Interesante tebes atu hatene kona-ba debate sira oinsá hanorin labarik sira atu lee, ne’ebé mak agora sai tópiku atuál iha Victoria nomós iha Timor-Leste.
Aleinde ne’e, S.E. Ministra Edukasaun Dra. Dulce de Jesus Soares mós hala’o enkontru ho Diretora Ezekutivu ba Parseria no Tranzisaun “Technical And Further Education” (TAFE) Victoria nomós Reitór Universidade Victoria, DR. Adam Shoemaker, hodi fahe informasaun kona-ba sistema treinamentu no hato’o sira-nia prontidaun atu esplora posibilidades kona-ba modellu estajiáriu (traineeship) ba profesore no alunu sira TECVOC husi Timor-Leste.
Universidade Victoria mós hatudu ninia komitmentu nomós prontidaun atu fó apoiu ba Timor-Leste, liu-liu Ministériu Edukasaun nia prioridade sira hanesan formasaun ba edukadore pre-eskolár sira, apoiu treinamentu kona-ba lingua Inglés nomós fornese oportunidade ba profesore sira TECVOC Timor-Leste nian atu partisipa iha Universidade Victoria ninia “Block Model on Pedagogy”.
Hafoin remata tiha enkontru iha Melbourne, S.E. Ministra Edukasaun Dra. Dulce de Jesus Soares kontinua mai iha Darwin hodi sorumutu ho Senior Professor ba Edukasaun hosi Universidade Charles Darwin (CDU), ko’alia kona-ba programa inkubadór peskiza, kolókiu kona-ba literasia dijitál nomós formasaun ba futuru tutores pré-eskolár tuir ejizénsia Dekretu-Lei jestaun edukasaun pré-ekolár.
Enkontru sira iha Australia organiza no fasilita husi Sra. Kirsty Gusmão nomós Konsuladu Timor-Leste nian iha Melbourne no Darwin.
#jornalistaluis
#MédiaME
