Maliana, 29 Setembru 2025
Sua Exelénsia Ministra Edukasaun, akompaña Sua Exelénsia Vise-PM, MCAS no Ministro Dezenvolvimentu Rurál no Habitasaun Komunitária, Eng. Mariano ASSANAMI Sabino no Komandante PNTL Munisípiu Bobonaru, halo diálogu paz liuhusi formasaun karáter iha konstrusaun estadu ida ne’e, iha Ginájiu Maliana.
Iha diálogu ne’e, Sua Exelénsia Vise-PM, MCAS no Ministro Dezenvolvimentu Rurál no Habitasaun Komunitária, Eng. Mariano ASSANAMI Sabino, hateten, objetivu husi diálogu ne’e atu ko’alia ho estudante sira, katak sira mak jerasaun kontinuadór no lutadór sira-nia nia mehi hodi kontinua luta atu realiza sira-nia mehi no sai faktór determinante ba rai ne’e hodi lori nasaun ba oin.
“Importante tebes atu imi presiza hatene ita nia nasaun ne’e, husi ne’ebé, ohin iha ne’ebé no atu ba ne’ebé, ida ne’e maka ita ko’alia kona-ba ita-nia konstrusaun haat inportante, konstrusaun ba paz, konstrusaun estadu, konstrusaun nasaun no konstrusaun karákter hodi ita bele kontinua”, dehan S. E. V-PM.
V-PM hatutan, ba estudante sira, presiza kria paz entre imi ho imi, imi ho inan-aman, imi ho sosiedade, imi ho manorin sira. haka’as-an estuda, aprende atu loron ida imi bele lori nasaun ne’e ba oin tuir lutadór sira-nia mehi, sira mate, tanba rai ida ne’e no ita sira sira ne’ebé moris tenki haka’as nafatin atu atu lori nasaun ne’e ba oin.
Iha fatin hanesan, Sua Exelénsia Ministra Edukasaun, Dra. Dulce de Jesus Soares hateten, ohin halo diálogu ba paz ida ho estudante sira kona-ba asuntu ne’ebé mak inportante tebes no amigável loos hodi ko’alia kona-ba formasaun karakter, disiplina étika morál no fó korajen ba estudante sira atu sai ema ne’ebé la’os matenek de’it iha disiplina ne’ebé maka sira estuda, maibé oinsá mak estudante ne’ebé mak bele kontribui ba dezenvolvimento paz iha nasaun ida ne’e liuhusi sira-nia karakter.
“Formasaun karakter ne’e mezmu ita iha ona edukasaun sívika ita iha matéria ne’ebé integradu kona-ba disiplina étika morál, maibé ho prezensa Sua exelénsia Vice-Ministru nian iha diálogu direta ho estudante sira ita haree ajuda tebetebes sira no fó korajen ba sira, nune’e sira bele lori sira nia-an ho di’ak iha komunidade, dehan S. E. Ministra Edukasaun.
Governante ne’e hatutan, Ministériu Edukasaun apresia tebetebes diálogu ida ne’ebé maka inisia husi Sua exelénsia Vise-Primeriu Ministru ne’e la’os foin primeiru, maibé hala’o ona iha Munisípiu Díli no ohin mai iha Munisípiu Bobonaro no sei kontinua nafatin ba Munisípiu seluk. Importante atu sira bele sai ema ne’ebé bele dehan tuir kurríkulu siklu-21 nian katak komunikasaun, kooperasaun étika morál nomós uzu teknolojia, nune’e sira bele uza buat sira ne’e ho objetivu.
#jornalistaluisalmeida
#MédiaME
