Baucau, 7 Agostu 2026 — Ministériu Edukasaun enserra formasaun Faze III Reforma Kurríkulu, ne’ebé hala’o durante loron tolu iha Eskola Ensinu Báziku Sentrál Vila Nova, Baucau, ho partisipasaun husi manorin, formadór nasionál no munisipál, no dirijente sira husi Ministériu Edukasaun.
Iha okaziaun ne’e, Diretór Edukasaun Munisípiu Baucau, Sr. Afonso dos Santos da Costa, apresia esforsu no empeñu ne’ebé partisipante sira hatudu durante formasaun no enkoraja manorin sira atu aplika koñesimentu ne’ebé sira hetan iha implementasaun kurríkulu foun.
Nia mós subliña importánsia ba manorin sira atu kontinua hasa’e sira-nia koñesimentu kona-ba Kuadru Kompeténsia Manorin (KKM), jestaun tempu, komunikasaun no preparasaun materiál didátiku, nu’udar elementu importante sira atu hadi’a kualidade prosesu ensinu no aprendizajen.
Iha parte seluk, Sub-Inspetór-Jerál Ministériu Edukasaun, Sr. Rodolfo Henrique Aparicio, hato’o apresiasaun ba entuziazmu, espíritu kooperasaun no kapasidade análize krítika ne’ebé partisipante sira hatudu durante formasaun.
Sub-Inspetór-Jerál mós enkoraja manorin sira atu aplika iha sira-nia prátika pedagójika koñesimentu no kompeténsia ne’ebé sira hetan durante formasaun, ho objetivu atu hadi’a aprendizajen no prepara estudante sira ba futuru.
Enkuantu ne’e, Xefe Departamentu Edukasaun Pré-Eskolár no Ensinu Báziku Institutu Nasionál Formasaun Dosente no Profisionál Edukasaun (INFORDEPE), Sr. Agustinho Pinto, subliña katak reforma kurríkulu foun tau estudante iha sentru prosesu edukativu.
Tuir nia esplikasaun, abordajem kurrikulár foun adopta métodu ensinu ida-ne’ebé 75% sentradu ba estudante no 25% ba manorin, hodi hametin papél manorin nu’udar fasilitadór iha prosesu ensinu no aprendizajen.
Formasaun Reforma Kurríkulu Faze I, II no III, ne’ebé hala’o iha munisípiu sira, hetan apoiu finanseiru no tékniku husi UNESCO, UNICEF, UNFPA, CNC, Peace Corps no Mary MacKillop Today.
Inisiativa ne’e integra esforsu Ministériu Edukasaun nian atu hametin kompeténsia manorin sira no apoia implementasaun graduál reforma kurríkulu foun, ho objetivu atu hadi’a kualidade ensinu no promove aprendizajen ne’ebé sentradu liután ba nesesidade no dezenvolvimentu estudante sira.
[PORTU]
MINISTÉRIO DA EDUCAÇÃO CONCLUI FORMAÇÃO DA FASE III DA REFORMA CURRICULAR EM BAUCAU
Baucau, 7 de agosto de 2026 — O Ministério da Educação concluiu a formação da Fase III da Reforma Curricular, realizada na Escola do Ensino Básico Central Vila Nova, em Baucau, durante três dias, com a participação de professores, formadores nacionais e municipais, bem como de dirigentes do Ministério da Educação.
Na ocasião, o Diretor da Educação do Município de Baucau, Sr. Afonso dos Santos da Costa, reconheceu o empenho demonstrado pelos participantes ao longo da formação e encorajou os professores a aplicarem os conhecimentos adquiridos na implementação do novo currículo.
O responsável destacou igualmente a importância de os professores aprofundarem os seus conhecimentos sobre o Quadro de Competências dos Professores (QCP), a gestão do tempo, a comunicação e a preparação de materiais didáticos, enquanto elementos fundamentais para melhorar a qualidade do processo de ensino e aprendizagem.
Por sua vez, o Subinspetor-Geral do Ministério da Educação, Sr. Rodolfo Henrique Aparicio, manifestou o seu apreço pelo entusiasmo, espírito de cooperação e capacidade de análise crítica demonstrados pelos participantes durante a formação.
O Subinspetor-Geral encorajou ainda os professores a aplicarem, nas suas práticas pedagógicas, os conhecimentos e competências adquiridos durante a formação, tendo em vista a melhoria da aprendizagem e a preparação dos estudantes para o futuro.
Entretanto, o Chefe do Departamento de Educação Pré-Escolar e Ensino Básico do Instituto Nacional de Formação de Docentes e Profissionais da Educação (INFORDEPE), Sr. Agustinho Pinto, sublinhou que a nova reforma curricular coloca o estudante no centro do processo educativo.
Segundo o responsável, a nova abordagem curricular prevê uma metodologia de ensino em que 75% do processo está centrado no aluno e 25% no professor, reforçando assim o papel do professor como facilitador do processo de ensino e aprendizagem.
A formação da Reforma Curricular – Fases I, II e III, realizada nos diferentes municípios, contou com apoio financeiro e técnico da UNESCO, UNICEF, UNFPA, CNC, Peace Corps e Mary MacKillop Today.
A iniciativa integra os esforços do Ministério da Educação para reforçar as competências dos professores e apoiar a implementação gradual da nova reforma curricular, com o objetivo de melhorar a qualidade do ensino e promover aprendizagens mais centradas nas necessidades e no desenvolvimento dos estudantes.
MédiaME — Lúcia Alves
