Díli, Loron, Sesta-feira, 15 Marsu 2024
S.E. Primeiru Ministru Kay Rala Xanana Gusmão no S.E. Prezidente Parlamentu Nasionál Maria Fernanda Lay hamutuk ho Ministériu Edukasaun no Komisaun Funsaun Públika ofisialmente halo abertura ba teste eskrita eletróniku ba bolsa kandidatu ba manorin ho tema "Juntos Construímos a Nossa Nação Através de uma Educação de Qualidade" ne'ebé hala'o iha Salaun Ai-Kurus Binani CFP, Matadoru.
Iha diskursu, S.E. Primeiru Ministru, José Alexandre Gusmão “Kay Rala Xanana Gusmão” akresenta, sistema ida ne’ebé di’ak ba funsionáriu sira hamosu transparánsia, ne’e mak hanaran teste eletróniku ne’e di’ak teb-tebes, kandidatu sira esforsu-an ba lalika lakon esperansa katak, la liu agora nafatin esforsu-an.
“Funsionáriu hotu-hotu ne’ebé ba kaer nia knaar hodi servisu tenki ho laran no fuan, la’os de’it atu ba simu osan, maibé atu ba serví rai ida ne’e no serví povu ida ne’e, ita tuir dadauk ona dalan ne’ebé loos no tranparante hodi hili timoroan sira ne’ebé kapasitadu atu hanorin labarik sira sai sidadaun ne’ebé di’ak”, dehan S.E. Primeiru Ministru.
Xefe governu ne’e mós enkoraza kandidatu sira atu esforsu-an no lalika lakon esperansa, katak laliu karik la iha ona, maibé prepara-an ba okaziaun seluk, tanba edukasaun rasik mós presiza hadi’a nafatin sistema hodi loke kondisoens sira ne’e to’o área rurál atu labarik sira bele asesu ba eskola.
Iha fatin hanesan, S.E. Ministra Edukasaun Dra. Dulce de Jesus Soares esplika, governu promove kualidade ensinu iha Timor-Leste, ho kualidade ba iha prioridade prgorama IX Governu Konstitusionál nian ne’ebé rekoñese hanesan elementu fundamentál ida ba dezenvolvimentu nasaun nian, tanba hatene katak, ensinu kualidade mak mai ho manorin kualifikadu no dedikadu hodi inspira no motiva alunu sira hodi alkansa susesu akadémiku ho ninia grau pesoál hodi garante ba kada alunu.
“Iha matéria jerál no espesífiku hanesan Lian Portugeza, Lian Ingleza, Lian Tetun, Matemátika, Istória, Geografia no Siénsia Naturais no tuir bolsa ne’e iha manorin hamutuk na’in rihun rua atus haat (2.400) ne'e sei halo uluk kolokasaun ba na’in rihun ida (1000) iha inisíu hafoin kontinua tan”, dehan S.E. Ministra Edukasaun.
Governante ne’e hatutan tuir kapasidade ne’ebé Komisaun Funsaun Públika iha dadaun agora komputadór hamutuk atus rua (200), nune’e ba futuru sei reforsa liután servisu Komisaun Funsaun Públika nian atu bele iha liu fasilidade hodi bele fasilita lalais servisu sira.
Aleinde ne'e, S.E. Prezidente Komisaun Funsaun Públika, Sr. Agostinho Letêncio de Deus hateten, konkursu ne’e hahú husi prosesu aplikasaun ba vaga bolsa kandidatu dosente ne’ebé ema hamutuk 14.152 mak aplika. Husi totál ne’e, aplikante admitidu ba teste eskritu eletróniku hamutuk 13.021 no parabéns ba inan feton sira, tanba iha teste ne’e númeru dominante mak feto ho total 7.924 no mane hamutuk 5.097.
“Serimónia teste eletróniku ida ne'e mós nu'udar rezultadu esforsu Governu Konstitusionál Da-9 nian liuhusi Ministériu Edukasaun no servisu hamutuk ho Komisaun funsaun públika no akompana husi sosiedade sivil no partisipasaun husi NGO BELUN ne'ebé maka ohin konsege realiza primeiru konkursu públiku rekrutamentu manorin desde restaurasaun independensia”, dehan S.E. Prezidente Funsaun Públika.
Teste ida ne'e mós loke odamatan entrada ba kareira dosente no kria oportunidade ba manorin sira atu ezerse funsaun ho dignidade, profesionál ho espetativa prosesu ida ohin bele hamenus ona problema voluntáriu atu bele atinji mehi kualidade manorin sira-nian maka teste ida ne'e depende ba kandidatu sira atu demonstra sira-nia konesimentu liuhusi resposta ba kada pergunta no partisipante sira mós sei asiste sira nia resposta imediatamente depois teste remata.
Serimónia abertura ne’e hetan partisipasaun husi Prezidente Parlamentu Nasionál no Prezidente Komisaun G no Destintu Deputadu sira, Ministru Ensinu Superior Sekretáriu Estadu Ensinu SekundáriuJerálnoEnsinuTéknikuVokasionál, Sekretáriu Estadu Komunikasaun Sosiál no funsionáriu sira Ministériu Edukasaun nian no Sekretariadu KFP, enkuantu teste ne’e hahú ohin no sei remata iha loron 16 fulan abril 2024.
