Dili, 01 outubru 2025
Ministériu edukasaun liuhusi Inpeksaun Jerál Edukasaun ne'ebé lidera husi Sub-Inspetór Jerál, Núkleu, Administrasaun Eskolár Superintendente Rodolfo Henrique Aparicio hamutuk ho Diretór Eskola Sekundária Jerál 10 de Dezembru Comoro Sr. Manuel Verdial hato'o klarifikasaun ba públiku ligadu ho akontesimentu inséndiu ne'ebé akontese iha areadór eskola nian.
Diretór Eskola Sekundária Jerál 10 de Dezembru Comoro Sr.Manuel Verdial klarifika, informasaun ne'ebe hatete katak Estudante Ensinu Báziku maka sunu biblioteka Eskola Ensinu Sekundáriu nian, ne'e laloos ka informasaun ne'e falsa. Tanba ne'e atu justifika katak surat-tahan at sira ne'ebé butuk ka tau hamutuk iha biblioteka oin no muru hun maka hetan ahi han.
" Ahi han duni surat-tahan at sira-ne'e iha li'ur la'os estudante sira maka sunu maibé deskonfia husi ema deskoñesidu balun ne'ebé fuma iha areadór eskola ba soe sigaru nia restu ba surat-tahan sira- ne'e hodi ikus mai rezulta ahi han surat-tahan at sira- ne'e" Dehan Diretór ESG 10 Dezembro.
Lider másimu husi eskola ne'e esplika, momentu akontese ahi han ne'e, laiha ema ida maka iha ne'ebá maibé iha de'it maka badaen sira ne'ebé halo reabiltasaun ba muru eskola nian tanba akontesimentu ne'e akontese iha loron sábadu oras tuku 08,00 liu. Maske nune'e, hetan atuasaun ka hamate husi badaen no profesór sira ne'ebé halo hela servisu iha eskritóriu.
"Nune'e atu klarifika ba públiku katak la'os sunu biblioteka Eskola sekundária Jerál 10 de Dezembru Comoro nian maibé ahi han de'it surat-tahan at ne'ebé tau hamutuk iha Biblioteka nia oin "tenik Diretór ne'e.
Enkuantu bainhira rona informasaun ne'e maka Ministériu Edukasaun liuhusi Inpesaun Jerál Edukasaun ne'ebé lidera husi Sub-Inspetór Jerál Núkleu Administrasaun Eskolár Superintendente Rodolfo Henrique Aparicio ho ekipa tun kedas ba terrenu hodi halo observasaun hodi buka tuir kronolojia husi akontesimentu ne'e.
