MANUFAHI, 23 JULLU – Ministériu Edukasaun, liuhosi Institutu Nasionál Formasaun Dosente no Profissionál Edukasaun (INFORDEPE), kontinua implementa Kurríkulu Foun ba Ensinu Báziku Siklu III liuhosi atividade prátika aprendizajen iha Eskola Ensinu Báziku Sentrál (EBC) 1, 2 no 3 Diligência, Munisípiu Manufahi.

Objetivu husi atividade ne’e maka atu fó dalan ba formandu sira atu aplika direta métodu no estratéjia hanorin ne’ebé aprende durante formasaun, liu-liu ho sistema aprendizajen ne’ebé sentra ba estudante.

Iha prátika ne’e, formandu sira hanorin disiplina Fraternidade Humana, Siénsias Sosiais, no Literasia Tetun. Estudante hamutuk 84 partisipa ativamente iha diskusaun, serbisu grupu no ezersísiu prátiku hodi dezenvolve sira-nia pensamentu krítiku no abilidade rezolve problema.

Formadora INFORDEPE, Nuhar Maria dos Santos, hatete katak prátika ne’e importante atu sukat kompeténsia pedagójika profesór sira. “Liuhosi observasaun direta no feedback konstrutivu, profesór sira bele hadi’a sira-nia maneira hanorin no implementa Kurríkulu Foun ho efetivu,” nia afirma.

Formandu Domingos da Costa rekoñese katak simulasaun ne’e fó esperiénsia valiozu atu aplika métodu foun iha sala aula.

Atividade ne’e sai parte husi kompromisu ME atu prepara manorin sira hodi implementa Kurríkulu Foun iha tinan letivu oin mai.

_MediaME/Abel Jolino_