𝐌𝐄 𝐇𝐀𝐌𝐔𝐓𝐔𝐊 𝐇𝐎 𝐄𝐓𝐓𝐆, 𝐈𝐍𝐀𝐆𝐔𝐑𝐀 𝐄𝐃𝐈𝐅Í𝐒𝐈𝐔 𝐅𝐎𝐔𝐍 𝐏𝐑É-𝐄𝐒𝐊𝐎𝐋Á𝐑 𝐈𝐇𝐀 𝐁𝐔𝐑𝐔𝐌𝐀

Baucau – Loron Segunda-feira, 24 Marsu 2025

Sua Eselénsia Ministra Edukasaun Dra. Dulce de Jesus Soares, hamutuk ho East Timor Trading Group no Spend it Well, inagura Edifísiu foun Pré-Eskolár Avó Ana Irena Olimpia de Almeida, iha Suku Buruma, Postu Administrativu Baucau-Vila.

Iha Diskursu, Sua Exelénsia Ministra Edukasaun Dra. Dulce de Jesus Soares, hateten, ba komunidade Buruma, apresia ho ita-boot sira-nia sorte, katak ema hili komunidade ida-ne’e atu harii pré-eskolár, tanba ne’e, enkoraza ita-boot sira atu lori oan loroloron ba eskola atu sira preparadu hodi aprende, preparadu atu halo belun, preparadu atu hetan dezafiu, no preparadu atu simu estimulasaun.

“Obrigada barak ba Ita-Boot sira hotu nia prezensa hodi tulun labarik sira, ne’ebé mak ita-nia nasaun nia futuru. Ho hanoin ida-ne’e ha’u hakarak oferese ha’u-nia apresiasaun kle’an ba East Timor Trading Group, liuliu ba Sr. Saqib Awan, Madam Neelo Awan, no Sr. Saqib nia oan-feto, Sra. Zeenat Aluwihare”, dehan S.E. Ministra Edukasaun.

Governante ne’e mós husu ba komunidade sira hotu, atu asegura katak edifísiu ida-ne’e la’ós de’it hetan manutensaun di’ak, maibé hadi’ak no halo furak liután liuhosi Ita-boot sira-nia kuidadu. Liuhosi parseria entre Ministériu Edukasaun, East Timor Trading Group, no Spend it Well, Ita-Boot sira agora iha edifísiu pré-eskolár ho kualidade aas tebes.

Iha fatin hanesan, Moderadór ba East Timor Trading Group, Sra. Saqib Awan, hateten, onra boot ida, ohin bele mai iha ne’e hodi mai inagura edifísiu pré-eskolar Avó Ana Irena Olimpia de Almeida, no ida ne’e hanesan inísiu ba futuru ne’ebé nabilan liu ba Baucau oan sira.

“Ami fiar metin katak, edukasaun mak fundasaun ba sosiedade ida ne’ebé útil no prósperu, tanba ne’e mak ohin loron ami iha ne’e, bainhira ita haree labarik sira halibur iha ne’e, ita haree hetan futuru Timor-Leste nian, tanba haree joven sira nakonu ho mehi, kuriozidade no potensiál atu muda mundu, maibé mehi sira ne’e atu loos, sira presiza ambiente ne’ebé mós no sala-aula ne’ebé seguru”, dehan Moderadór ETTG.

Hafoin remata inagurasaun edifísiu pré-eskolár iha Buruma, Sua Exelénsia Ministra Edukasaun Dra. Dulce de Jesus Soares, kontinua ba Servisu Edukasaun Munisípiu Baucau hodi observa direta, kandidatura sira ba bolsa kandidatu ba área Ensinu Sekundáriu Jerál no Ensinu Sekundáriu Tékniku Vokasionál, ne’ebé dadaun ne’e konkore ona.

#MédiaME