Dili, 24 Novembru 2025
Sua Exelénsia Ministra Edukasaun, Dra. Dulce de Jesus Soares, hamutuk ho Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál, Sr. Domingos Lopes Lemos, partisipa iha feira ba selebrasaun loron istóriku aniversáriu Proklamasaun Unilaterál Independénsia Repúblika Demokrátika Timor-Leste nian ba dala-50, ne’ebé loke ofisiálmente husi Sua Exelénsia, Prezidente Repúblika, J. Ramos-Horta, iha Tasi-tolu.
Iha vizita feira, Sua Exelénsia Ministra Edukasaun, Dra. Dulce de Jesus Soares, husu apoiu husi inan soru-na’in sira, atu bele prezensa iha eskola hodi hanorin mós estudante sira kona-ba soru-tais, múzika tradisionál sira, no tradisaun sira seluk, iha loron sábadu, hanesan atividade ekstra kurríkulár, atu orijén sira ne’e hatutan ba jerasaun foun sira.
“Ami husu apoiu husi ama sira atu bele hanorin ita-nia oan sira iha eskola kona-ba soru-tais, múzika sira tradisionál no tradisaun sira seluk, nune’e ita-nia oan sira aban-bainrua bele kontinua fali atividade sira ne’e. Bele hanorin ita-nia oan sira iha loron sábadu, hanesan loron ne’ebé mak sira halo atividade ekstra kurríkulár”, dehan S. E. Ministra Edukasaun.
Feira ne’e, sei loke ba públiku husi loron 24 to'o 29 fulan-novembru, Feira Nasionál ne'e organiza husi Ministériu Administrasaun Estatál, ne’ebé kada pavilaun munisipál aprezenta produtu agríkola ho apoiu husi Governu no ajénsia internasionál no mós hatudu atinjimentu sira hodi prepara ba kámara munisipál iha tinan 2027. Sidadaun sira bele asesu livre hodi haree arte, kultura no kriatividade husi grupu joven sira ne’ebé promove identidade munisipál, enkuantu Ministériu Komérsiu no Indústria mós organiza feira ai-han lokál nian.
#MédiaME
