𝐉𝐔𝐍𝐓𝐀 𝐌É𝐃𝐈𝐊𝐀 𝐒𝐄𝐈 𝐇𝐀𝐋𝐎 𝐄𝐙𝐀𝐌𝐈𝐍𝐀𝐒𝐀𝐔𝐍 𝐁𝐀 𝐒𝐀Ú𝐃𝐄, 𝐀𝐍𝐓𝐄𝐒 𝐑𝐄𝐅𝐎𝐑𝐌𝐀 𝐇𝐔𝐒𝐈 𝐊𝐀𝐑𝐑𝐄𝐈𝐑𝐀

Dili – Loron segunda-feira, 14 Abril 2025

Iha sorumutu hamutuk ho manorin-na'in reformadu no moras tempu naruk (Doença Prolongada), Sua Exelénsia Ministra Edukasaun, Dra. Dulce de Jesus Soares, esplika kona-ba posibilidade sira atu reforma, tuir kondisaun moras ne’ebé manorin-na’in sira enfrenta, maibé antes ne’e sei halo ezame ba sira-nia saúde liuhusi junta médika. Sorumutu ne’e realiza iha Salaun Administrasaun Munisípiu Liquiçá.

Iha serimónia abertura ne’e, Sua Exelénsia Ministra Edukasaun, Dra. Dulce de Jesus Soares, hateten, mai iha ne’e hodi hato’o agradesimentu boot ba manorin-na'in sira-nia kontribuisaun ne’ebé bo'ot tebetebes ba rai ida-ne’e atu eduka timoroan sira hodi to’o ohin loron barak mak sai ona matenek hodi serve rai ida-ne’e.

“Ha’u-nia prezensa iha ne’e, simplesmente atu fó esplikasaun ida ba Ita-Boot sira kona-ba prosesu ne’e, depois ida-ne’e médiku sei mai hodi halo ezaminasaun ba Ita-Boot sira nia saúde hodi buka hatene, kona-ba posibilidade atu kontinua hanorin ka labele ona hanorin”, dehan S.E. Ministra Edukasaun.

Governante ne’e agradese ba Komisaun Funsaun Públika liuhusi Prezidente atuál no mós Institutu Nasionál Seguransa Sosiál, hamutuk ho Ministériu Edukasaun, konsege hatuur sistema ida ne’ebé modernu liu hodi bele hadi’a sistema rekursu umanu iha Ministériu Edukasaun, tanba ministériu iha responsabilidade bo'ot ida hodi aposta ba kualidade edukasaun liuhusi servisu manorin-na'in nian.

Hafoin remata sorumutu ne’e, Sua Exelénsia Ministra Edukasaun, Dra. Dulce de Jesus Soares, hamutuk ho ekipa, ba vizita manorin na’in-rua, hanesan, manorin Vitorino Correia no manorin Mariano dos Santos, ne’ebé la partisipa sorumutu ne’e, tanba ho kondisaun moras kle’ur ona, hodi fó korajen no nafatin husu atu halo tratamentu ba saúde hodi bele rekopera filafali husi moras refere.

#MédiaME