𝙇𝙊𝙍𝙊𝙉 𝙈𝙐𝙉𝘿𝙄Á𝙇 𝙇𝙄𝙑𝙍𝙐: 𝙈𝙄𝙉𝙄𝙎𝙏𝙍𝘼 𝙀𝘿𝙐𝙆𝘼𝙎𝘼𝙐𝙉 𝙃𝙐𝙎𝙐 𝘼𝙏𝙐 𝙋𝙍𝙊𝙈𝙊𝙑𝙀 𝙇𝙀𝙄𝙏𝙐𝙍𝘼 𝙄𝙃𝘼 𝙁𝘼𝙈Í𝙇𝙄𝘼

𝙇𝙊𝙍𝙊𝙉 𝙈𝙐𝙉𝘿𝙄Á𝙇 𝙇𝙄𝙑𝙍𝙐: 𝙈𝙄𝙉𝙄𝙎𝙏𝙍𝘼 𝙀𝘿𝙐𝙆𝘼𝙎𝘼𝙐𝙉 𝙃𝙐𝙎𝙐 𝘼𝙏𝙐 𝙋𝙍𝙊𝙈𝙊𝙑𝙀 𝙇𝙀𝙄𝙏𝙐𝙍𝘼 𝙄𝙃𝘼 𝙁𝘼𝙈Í𝙇𝙄𝘼

Manatutu, 08 Maiu 2025 — Sua Exelénsia Ministra Edukasaun, Dra. Dulce de Jesus Soares, hamutuk ho Reprezentante Banku Mundiál iha Timor-Leste, Sr. Bernard Harborne, hala’o lansamentu livru iha Eskola Ensinu Báziku Filiál BE’EDAN, hodi selebra Loron Mundiál Livru, ho estudante no inan-aman sira, iha Munisípiu Manatutu.

Iha komemorasaun Loron Mundiál Livru ne’e, Sua Exelénsia Ministra Edukasaun, Dra. Dulce de Jesus Soares, preokupa kona-ba dezinterese ba leitura, tanba ema barak prefere haree telefone dukee lee. Nune’e, enkoraja inan-aman sira atu tau prioridade ba leitura ho oan sira iha uma, tanba liuhusi leitura bele hadi’a dezenvolvimentu kognetivu no fó oportunidade ba aprendizajen barak liu tán.

“Inan-aman sira iha papél importante hodi motiva no fó apoiu ba oan sira atu aprende no konsidera leitura tenki sai parte importante iha moris loron-loron iha uma,” hateten S.E. Ministra Edukasaun.

Iha okazaun ida ne'e, halo mós lansamentu ba biblioteka dijitál husi INFORDEPE ho naran Learning Passport, ne'ebé permite profesór sira asesu ba livru no kontéudu edukativu liuhusi telefone no leptop mezmu offline, tanba sistema ne’e la presiza internet.

Hafoin lansamentu ne’e, Sua Exelénsia Ministra Edukasaun, Dra. Dulce de Jesus Soares Dra. Dulce de Jesus Soares, hala’o mós inagurasaun ba edifísiu Eskola Pre-eskolár Beadi no dapur ba programa merenda eskolár iha Suku Aiteas, Manatutu. Inagurasaun ne’e importante atu garante kondisaun aprendizajen di’ak ba labarik sira.

Sua Exelénsia Ministra Edukasaun, Dra. Dulce de Jesus Soares, hamutuk ho Sua Exelénsia Ministru Estatal, Sr. Tomás do Rosário Cabral no Sua Exelénsia Sekretáriu Estadu ba Formasaun Profesionál no Empregu (SEFOPE), Sr. Rogério Araújo Mendonça, hala’o mós inagurasaun edifísiu foun SEFOPE iha Manatutu, hodi reforsa rede formasaun no empregu iha nivel lokál.

#MédiaME