Bobonaro, loron 14 fulan Abríl 2025
Sua Exelénsia Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos, halo lansamentu asinatura plaka kursu foun ba Departamentu Tékniku Jestaun Ekipamentu Informátika, iha Eskola Sekundária Téknika Vokasionál Dom Bosco Maumali Maliana segunda-feira ne’e.
Iha Intervensaun Sua Exelénsia Sekretáriu Estadu ESJ-ESTV hatete, ohin mai formaliza kursu Informátika nian ne'ebé prosesu aprendizajen ensinu durante ne'e la'o hela, ekipa ohin mai atu formaliza de'it kursu ne’e atu nune’e sira kontinua prosesu aprendizajen ne’e.
"Dirijente ida-idak iha nia mekanizmu rasik hodi jere eskola, eskola ne'e eskola Públika ne'ebé jere husi misaun Salezianu sira, eskola ESTV Maumali prosesu aprendizajen la'o di'ak no Jestaun la'o di'ak tebetebes".
Governante ne’e, husu ba estudante ESTV Maumali atu aproveita didi'ak prosesu aprendizajen durante halo estudu iha eskola ESTV Maumali tanba eskola ne'e Jestaun la'o di'ak no ekipamentu prátika sira naton ba estudante sira hodi halo prátika durante prosesu aprendizajen.
Fatin hanesan Diretór Eskola Sekundáriu Tékniku Vokasionál Dom Bosco Maumali Irmão, Marçal Amaral Lopes, SDB dehan, durante ne'e eskola la'o ho Departamentu Tékniku Eletrisidade, haree ba fatin, fasilidade mós iha eskola ESTV servisu hamutuk ho Ministériu Edukasaun Diresaun Sekundáriu Tékniku Vokasionál aumenta tan Kursu Tékniku Jestaun Ekipamentu Informátika hahú iha tinan 2025.
"Durante ne'e kursu Informátika nia prosesu aprendizajen la'o hela, ohin loron Sua Exelénsia Sekretáriu Estadu ESJ-ESTV no ekipa mai formaliza de'it kursu refere".
Hafoin asinatura plaka kursu Informátika ne’e Sua Exelénsia Sekretáriu Estadu ESJ-ESTV no ekipa halo observasaun ba ekipamentu prátika no Dormitoriu sira.
Departamentu Tékniku Jestaun Ekipamentu Informátika estudante hamutuk na'in 30. Eskola Sekundáriu Téknika Vokasionál Maumali Maliana estudante hamutuk na'in 139.
#MédiaME
