𝐃𝐢𝐥𝐢, 𝟐𝟏 𝐍𝐨𝐯𝐞𝐦𝐛𝐫𝐮 𝟐𝟎𝟐𝟓
Sua Exelénsia Ministra Edukasaun, Dra. Dulce de Jesus Soares, partisipa iha serimónia asinatura akordu entre Governu Japaun no WFP hodi sai testemuña ba kontribuisaun orsamentu USD 700,000 atu sustenta Programa Merenda Eskolár Timor-Leste iha tinan 2026, hodi fornese foos ba eskola liu 350 no benefisia labarik sira liu 100,000 iha munisípiu Covalima, Aileu, Lautem no Dili. Serimónia ne’e realiza iha Salaun Hotel Timor.
Iha diskursu, Sua Exelénsia Ministra Edukasaun, Dra. Dulce de Jesus Soares, hateten, lori Governu Timor-Leste nia naran, agradesimentu kle'an ba Governu Japaun ba investimentu hamutuk, USD 700,000 ba aprovizionamentu foos hodi fornese ai-han ba labarik sira hamutuk liu 100,000 no hametin fundasaun sira husi ita-nia programa nasionál ba ai-han eskola nian iha tinan 2026, hodi loke dalan ba Timor-Leste ida-ne'ebé saudavel, edukadu no prosperu liu.
“Ha'u mós hakarak rekoñese Programa Ai-han Mundiál Nasoins Unidas nian ba ninia parseria no dedikasaun kontinua hodi hadi'a seguransa ai-han no nutrisaun iha ita-nia rai. WFP hahú iha tinan 2005 ho programa hahán eskola nian. Kontinua fó asisténsia atu hadi'a liután programa ne'e no fó apoiu ba Timor-Leste hodi hatudu mós ninia realizasaun ba autór sira seluk. Hamutuk, serbisu hamutuk hodi halo diferensa iha ami-nia oan sira-nia moris”, dehan S. E. Ministra Edukasaun.
Governante ne’e hatutan, agora mai ita hanoin-hetan katak kolaborasaun mak xave ba progresu. Ho apoiu husi ita-nia parseiru sira no kompromisu husi ita-nia governu, ita sei kontinua servisu ho laran-metin hodi asegura katak labarik ida la hela iha kotuk.
Iha fatin hanesan, Sua Exelénsia Embaixadór Japaun iha Timor-Leste, Sr. KIMURA Tetsuya, hateten, Governu Japaun no Programa Ai-han Mundial Nasoins Unidas nian (WFP) ohin asina akordu ida atu hametin Timor-Leste nia programa nasionál merenda eskolár iha tinan 2026. Kontribuisaun- Japaun nian, USD 700, OOO (JPY 100, O00, 000), sei fo dalan ba WFP atu suporta foos ho tonelada 330 ba Ministeriu Administrasaun Estatal no Ministeriu Edukasaun hodi fornese ba eskola liu 350, to'o labarik sira liu 100,000 iha munisípiu haat hanesan Covalima, Aileu, Lautem no Dili.
“Ami espera katak foos ne'e sei fó enerjia ba labarik sira nia kresimentu saudável no bele hetan susesu iha akademiku. Tamba ne'e, ami hein katak fornesimentu foos ne'e sei promove kustumi han ne'ebé saudável no koñesimentu ba labarik sira iha Timor-Leste atu hadi'a sira nia isin lolon no kakutak”, dehan Embaixadór.
Embaixadór ne’e hatutan, hahán eskola nian mak investimentu importante ida iha kapitál umanu Timor-Leste, ajuda hamenus hamlaha, hadi'a nutrisaun, no suporta prezensa eskola nian. Apoiu Japaun nian reforsa esforsu nasionál sira atu proteje labarik sira-nia saúde no moris di'ak no hametin reziliénsia sistema hahán eskola nian. WFP kontinua servisu hamutuk ho Governu Timor-Leste no parseiru dezenvolvimentu sira atu promove seguransa ai-han no nutrisaun, hodi kontribui ba objetivu dezenvolvimentu ba tempu naruk iha nasaun ne'e.
#MédiaME
