Díli - Kinta-feira, 20/03/2025
Ministériu Edukasaun liuhosi Diresaun Nasionál Sistema Informátika no Teknolójia (DNSIT), Xefe Departamentu Televizaun Sr. Leonardo de Araujo inklui Tékniku sira hala’o sosializasaun Programa Tele-Eskola ba estudante sira iha Eskola Ensinu Báziku 3° Siklu Fatumeta Díli.
Iha sosializasaun ne'e, Konsellu Estudantil EBC Fatumeta Sr. Saturnino Fonseca da Costa Soares, hateten, programa ne’e importante tanba halo estudante sira aprende liu husi youtube no téknolojia seluk, ba sira ne’ebé laiha asesu direita ba livru ka profesór sira.
“Iha programa ne’e, estudante bele aprende ba materia importante hanesan matemátika, portugés no siénsia seluk ne’ebé Ministériu Edukasaun fornese iha kanál youtube Tele-Eskola”. Dehan Konsellu Estudantil.
Aleinde ne’e, Estudante 8 Ano, Levania Filomena Noronha ba Jornalista hateten, “ohin ami hetan informasaun kona-ba programa Tele-Eskola liu husi sosializasaun ne’ebé hala’o iha ami nia eskola, ekipa Ministériu Edukasaun esplika mai ami katak programa ida ne’e atu ajuda ami estudante sira kontinua aprende liu husi kanál youtube Tele-Eskola”.
“Ami hato’o agradese ba lideransa másimu Ministériu Edukasaun nian tanba bele orienta ekipa hakbesik mai iha ami nia eskola hodi fahe informasaun no ekipa hanorin ami oinsa ami bele asesu kanál youtube Tele-Eskola ne’ebé Ministériu Edukasaun públika ona vídeo”. Dehan Estudante Levania.
#Média-MEJornalistaEmilio
