"INAN AMAN SIRA TENKE AKOMPAÑA OAN SIRA NIA ESTUDA BA EZAME NASIONÁL."


Ministra da Educação, Juventude e Deporto, Dulce de Jesus Soares:
Dili, 15 Outubru, 2018- Ministra da Educação, Juventude e Deporto, Dulce de Jesus Soares, loke Abertura Ezame Nasionál iha Ensino Básico Central (EBC) Darlau, no Ensino Secundário Geral (ESG) 4 de Setembro.
Loron 15 Outubru, 2018 hanesan loron ne’ebé importante ba alunu finalista sira klase 9 no klase 12 (9º anu no 12º anu) tanba, iha loron ida-ne’e to’o loron rua oinmai mak sei teste sira-nia kapasidade ba nivel edukasaun ne’ebé durante tinan tolu nia laran sira aprende husi profesór sira, hodi koko sira-nia kualidade. Iha tinan 2018 totál estudante finalista na’in-50.548 mak partisipa iha ezame nasionál, iha nivel ensinu hotu.
Durante observasaun mosu fenómenu barak ne’ebé akontese, estudante balu kosar tanba la prepara ho di’ak, balun kontente tanba sira estuda nune’e sira sente matéria ezame fasil ba sira. Fenómenu seluk mós akontese estudante balu desmaia tanba la konsege jere sira-nia tempu minutu 120 ho di’ak, nune’e sira la konsege prenxe folla resposta hotu.
Iha abertura ba ezame nasionál Ministra Dulce de Jesus Soares husu ba inan-aman sira atu akompaña oan sira iha uma, nune’e sira bele estuda hodi hasoru ezame nasionál ida-ne’e. Ministra mós hatutan liután katak iha tempu loron tolu ne’e mak sei determina alunu sira-nia kapasidade loloos, nune’e bele bá nivel ensinu ne’ebé aasliu.
Iha fatin seluk akontese matéria ezame ne’ebé la to’o ba estudante balu, maibé bazeia ba orientasaun Ministra konsege rezolve problema ne’e. Iha Atauro akontese estudante ida mak hetan moras, nune’e iha profesór vigilante na’in-rua ne’ebé mak bá halo akompaña alunu ne’e hodi hala’o ezame iha uma. Ministra mós informa katak tuir observasaun iha territóriu Timór laran tomak ezame nasionál loron dahuluk la’o ho di’ak.