MEJD DISTRBUI APIOU BA ESKOLA SIRA IHA AINARO


Ainaro, 4/10/2018: Kada tinan Timor-Leste enfrenta fenómenu ambientál hanesan anin boot, udan boot, inundasaun, no seluk tan. Situasaun hirak ne’e sempre rezulta dezastre naturais no fó impaktu sériu ba komunidade nia moris.
Ministerio da Educação, Juventude e Desporto (MEJD) tau atensaun aas ba impaktu direta ka indireta hosi fenómenu ambiental hirak ne’e, tanba sempre destroi infraestrutura eskolár sira iha teritóriu Timor-Leste.
Durante tinan 2017 toó 2018, MEJD rejista ona infraestrutura eskolár iha Munisípiu sira ne’ebé hetan estragus husi anin boot, no inundasaun ne’ebé impede prosesu eskolár. Edifísiu eskola sira-nia kakuluk barak mak naksobu hotu hodi estraga ekipamentu aprendizajen sira, no ikus mai difikulta alunu sira-nia partisipasaun iha prosesu aprendizajen ho normál.
Realidade mós hatudu katak, iha munisípiu, prosesu aprendizajen seidauk la’o ho normal iha eskola balu to’o agora. Ezemplu hanesan Ensinu Báziku Filial (EBF) Teliga, iha Suku Teliga, Munisípiu Ainaro, ne’ebé afetadu hosi anin boot.
Hare ba situasaun refere, iha loron 4 Outubru 2018, Vice-Ministro da Educação, Juventude e Desporto, Ekselensia João Zacarias Freitas Soares, hamutuk ho Ekipa Konjuntu MEJD nian dezloka ona ba Suku Teliga, hodi entrega material konstrusaun pruvizoriu ba EBF Teliga. Material sira ne’e simu direitamente hosi Kordenadór EBF-Teliga, no akompaña hosi Sekretária Munisípiu Ainaro, Diretór Edukasaun, Adjuntu Komandante Polísia Munisípiu Ainaro.
MEJD nia esforsu ida ne’e nu’udar aktu responsiva hodi rezolve impaktu fenómenu ambientál hirak ne’e, maski hasoru difikuldade iha orsamentu. Tan ne’e MEJD buka koopera ho parseria dezenvolvimentu sira hanesan Fundu ba Labarik Nasoens Unidas nian/UNICEF, World Vision, Plan Internasionál no sira seluk tan, ne’ebé fó apoiu material konstrusaun sira (kaleen, ai-baluk, pregu no zinku).
Iha visita refere Vice-Ministro MEJD ho komitiva mos entrega mobiliáriu ba aprendijiazen sira hanesan meza, Kadeira, Material desportu no Livru ba Ensinu Sekundaria Geral (ESG) Fernando Lasama, Ainaro Vila, no ESG Katólika Hatu-Udo nian iha Munisipiu Ainaro.
"Iha tinan 2018 Ministériu (MEJD) laiha ona rezerva ba kadeira no Meza iha armazén, maibé Ministériu sei esforsu nafatin liu hosi Ekipa Konjuntu identifika ona eskola hirak ne’ebé mak la utiliza sira nia kadeira ho meza, nune’e Ministériu halibur fali hodi fó ba eskola hirak ne’ebé presiza ho karater urjente. Liu-liu tanba eskola hirak ne’e presiza tebes hodi realiza ezame nasionál.”
#Mídia_MEJD