ENKONTRU KONSELLU KOORDENASAUN MEJD


Dili-Ministério da Educação, Juventude e Desporto, realiza enkontru Konsellu Koordenasaun MEJD, iha salaun INFORDEPE, Matadoru, Dili, Loron 27 Setembru 2018.
Iha nia intervensaun Ministra da Educação, Juventude e Desporto, Dulce de Jesus Soares, husu ba Kargu Xefia sira iha nivel hotu-hotu atu hadi’a prestasaun servisu, no sistema Servisu, tanba iha servisu balun ne’ebé hanesan. Ministra mós husu ba diretór Munisípiu sira no Diretór Nasionál sira atu durante diskusaun iha enkontru ne’e atu fó idea ne’ebé krítiku no konstrutivu hodi bele hadi’a sistema servisu iha Ministériu Edukasaun.
Iha fatin hanesan Vice Ministru hato’o nia intervensaun husu ba funsionáriu tomak MEJD atu konsentra ba servisu, haluha tiha pensamentu públiku ne’ebé sempre dehan Edukasaun laiha kualidade, hodi baralla ita nia prestasaun servisu. Governante ne’e mós kontinua husu atu konsentra servisu hodi hatudu rezultadu, tanba Edukasaun la’ós Membru Governu nia de’it, la’ós Funsionáriu Ministériu Edukasaun nia de’it, maibé Timor tomak nia.
Hatán ba jornalista kona ba objetivu enkontru Konsellu koordenasaun, Ministra aprezenta katak enkontru ida ne’e atu ko’alia kona ba servisu sira ne’ebé hala’o tiha ona durante fulan Juñu to Agostu nune’e bele hare ba implementasaun ba orsamentu 2018, nune’e mós sei halo aliñamentu ba Plano 2019, hare mós servisu nivel Munisipál no Nasionál liu-liu hare ba dezafiu sira ne’ebé mak durante ne’e diretór sira enfrenta hodi nune’e bele buka solusaun.
Ministra mós salienta liu tan katak Enkontru koordenasaun ne’e sei hala’o fulan tolu dala ida. Enkontru ne’e partisipa husi Ministra no Vice Ministru Edukasaun, Diretór Jerál, Prezidente INFORDEPE no Vice sira, Diretór Nasionál, Diretór Munisipál, Superintendente sira, Xefe departamentu no Asesór sira, iha MEJD.
#Media_MEJD