Díli, 04 Setembru 2025
Ministériu Edukasaun, hamutuk ho parseiru dezenvolvimentu, Autoridade Munisipál no Suku sira, manorin, no inan-aman, realiza segunda Konferénsia Nasionál ho tema “Investir na Educação Pré-escolar Hoje para um Amanhã Mais Brilhante”, durante loron 2, hahú husi loron 04-05 fulan setembru, iha Salaun Mahoka.
Ministériu Edukasaun hamutuk ho parseiru dezemvolvimentu sira ne’ebé servisu iha área edukasaun, organiza konferénsia nasionál daruak ba edukasaun infánsia ho nia objetivu atu fahe esperiénsia kona-ba edukasaun infánsia no reforsa polítika Ministériu Edukasaun nian iha área pré-eskolár, tanba área ne’e hanesan baze fundamentál ba edukasaun.
“Pré-eskolár hahú husi tinan 3-5, atu labarik sira iha preparasaun antes kona-ba literasia no numerasia, nune’e bele prepara-an di’ak liután bainhira sira ba ensinu báziku. Servisu ida-ne’e ita bolu hamutuk ema hotu-hotu ne’ebé servisu iha área pré-eskolár atu bele apoiu programa pré-eskolár ne’e bele la’o ho di’ak atu labarik sira ne’ebé ho idade husi tinan 3-5 bele iha baze ida ne’ebé forte liután”, dehan S. E. Ministra Edukasaun.
Governante ne;e hatutan, dezde konferénsia dahuluk, Timor-Leste halo ona progresu signifikativu iha edukasaun infánsia hodi dezenvolve Kurríkulu Nasionál Edukasaun Pre-eskolár, estabelese Enkuadramentu Kompeténsia ba Profesór Pre-eskolár sira, no hahú prosesu desentraliza programa edukasaun pré-eskolár ba munisípiu sira hodi permite adaptasaun no implementasaun lokál. Munisípiu sira dezenvolve ona planu no estratéjia sira ne’ebé responde ba nesesidade lokál sira no mekanizmu koordenasaun sira, hanesan ACETL no komisaun munisípiu sira hodi fó apoiu ba prestasaun no monitorizasaun servisu edukasaun infánsia nian.
Iha fatin hanesan Sua Exelénsia Prezidente Repúblika, Dr. José Ramos-Horta, hateten, porsentu 90 husi arkitetura kakutak nian define ona iha tinan lima dahuluk, nune’e, edukasaun pre-eskolár reprezenta investimentu transformadór ida úniku ne’ebé nasaun ida bele halo. Aprendizajen sedu ho kualidade la’os de’it hanesan polítika edukasionál, maibé nu’udar estratéjia xave atu promove ekidade, hamenus dezigualdade no harii baze ida forte ba susesu futuru.
“Poténsia ne’e só bele aproveita liuhusi asaun estratéjika no koordenada. Dezafiu sira seidauk remata. Entre sira mak asesu limitadu iha área rurál no remota sira, nesesidade formasaun no apoiu kontinua ba profesór sira no falta rekursu adekuadu atu garante katak sei la husik labarik ida iha kotuk”, dehan S. E. Prezidente RDTL.
Xefe Estadu husu atu fó prioridade koletiva ba edukasaun pre-eskolár, konsidera inan-aman no kuidadór sira hanesan profesór dahuluk no defensór prinsipál ba labarik hodi harii baze edukasionál ida-ne’ebé metin. Tenki hamutuk ho família, komunidade, governu no parseiru internasionál sira atu garante labarik timoroan ida-idak iha oportunidade atu aprende, dezenvolve-an no buras.
Konferénsia nasionál ba dala-rua ne’e, hetan partisipasaun mós hosi oradór internasionál husi nasaun CPLP no ASEAN, parseiru dezenvolvimentu sira, Prezidente Autoridade Munisipál, Xefe Suku, Diretór Servisu Edukasaun Munisipál ho nia estrutura, Manorin sira husi Ensinu Pré-Eskolar no mós inan-aman.
#MédiaME
