Dili,14/9/2013 – Eskola Katolika Sao Miguel Tasi Tolu Dili, Sabadu (14/9/2013) komemora loron aniversariu ba dala 12 desde harii iha tinan 2002.
Komemorasaun loron aniversariu eskola Sao Miguel nee hetan prezensa husi Ministru Edukasaun, Bendito Freitas no Sekretariu Estadu Komunikasaun Sosial Nelio Isaac Sarmento.
Iha komemorasaun loron aniversariu nee, eskola Sao Miguel realiza eventu desportu hanesan basket ball no mos atividade seluk hanesan Sao Miguel Idol 2013, konkursu diskursu, dansa kultura, no fashion show.
Alende nee, eskola nee mos fo ajuda kadeira 500 ba eskola ensino baziku rua iha distritu lautem hodi apoiu prosesu aprendezazem estudante sira iha eskola refere neebe durante nee estuda tuur deit iha rai.
Hare ba progresu neebe hatudu husi eskola nee, Ministru Edukasaun Bendito Freitas gava manajementu eskola nee neebe konsege dezemvolve eskola nee ho kualidade no sai ezemplu ba eskola seluk.
Hafoin hatoo nia lia fuan, Ministru Edukasaun Bendito Freitas hamutuk Sekretariu Estadu Komunikasaun Sosial Nelio Isaac Sarmento halakan obor iha eskola refere nudar sinal katak eventu neebe realiza husi eskola nee offisialmente loke.
Sekretariu Estadu Nelio Isaac husu ba estudante sira atu hatudu nia matenek no sprotivitas durante partisipa iha iventu hirak neebe organiza husi eskola nee.

Fontes : The Timor news