Dili-Ministra da Educação, Juventude e Desporto , Dulce de Jesus Soares, observa loron primeiru ezame primeiru períodu iha Eskola Bázika Central (EBC) Faról no Eskola Bázika Central Akadiru-hun Dili, iha loron 01/04/2019.

Tuir Kalendáriu Eskolár Ensinu Báziku 3o Siklu (VII ano – IX ano), Ensinu Sekundáriu Jerál (X anó – XII anó), realiza ezame avaliasaun primeiru períodu iha territóriu Timor laran tomak, prova períodika ida ne’e ho karater lokál, nune’e sai responsabilidade eskola nian atu jere hodi realiza prova refere. Objetivu husi prova ida ne’e atu Produz rezultadu akumulítivu períodu ida nian, hodi nune’e alunu sira bele hetan informasaun progresu rezultadu aprendizajen períodu ida nian, hodi sai mós informasaun ba inan-aman sira nian nune’e bele akompaña oan sira nia progresu aprendizajen, informasaun ne’e hato’o husi Diretór Jerál Ensinu Pre-Eskolár, Ensinu Báziku no Ensinu Rekorente (DG-EP,EB e ER) Sr. Cidalio Leite, MEd.

Atu garante eskola sira bele realiza prova periodika ne’e, Ministra da Educação, Juventude e Desporto , Dulce de Jesus Soares, hala’o observasaun direita ba EBC Faról no EBC Akadiru-hun, iha vizita ne’e Ministra preokupa ho númeru alunu iha EBC Faról ne’ebé barak kuaze 2580 alunu, tanba Eskola Faról iha Filial hamutuk 4 ( EBF Fatuhada, EBF Rumbia, EBF Tuana-Laran no EBF Villa Verde), nune’e rezulta sala aprendizajen la sufisiente hodi akomoda alunu sira tanba sala ida kuaze .

Hatán kona-ba realidade ne’ebé akontese Ministra informa katak Ministériu Sei halo avaliasaun hodi bele halo Re-Agrupamentu nune’e bele hamenus númeru estudante sira iha Eskola sira, ezemplu Ensinu Báziku Central Faról nian. Ministra hatutan tan katak, dalan Re-Agrupamentu ne’e, bele identifika EBC balun ne’ebé númeru alunu ladún boot, bele aumenta fali filial husi EBC ne’ebé nia númeru Alunu boot.